Սկիզբ / Մամուլի տեսություն / Գեներալ Մանվել Գրիգորյանը զինվորի սնունդ չի յուրացրել. փաստաբան «Այսօր»

Գեներալ Մանվել Գրիգորյանը զինվորի սնունդ չի յուրացրել. փաստաբան «Այսօր»

Ազգային ժողովի նախկին պատգամավոր, Երկրապահ կամավորական միության վարչության նախկին նախագահ, գեներալ Մանվել Գրիգորյանի փաստաբան Արսեն Մկրտչյանի՝ երեկ երեկոյան արած գրառումը որոշ տարընկալումներ է առաջացրել: Aysor.am-ի թղթակցի հետ զրույցում Մկրտչյանը հստակեցրեց, որ Գրիգորյանի պաշտպանությունից ինքը չի հրաժարվում, իսկ գրառումը կատարել է որպես ազատամարտիկ, Երկրապահ կամավորական միության անդամ:
Հիշեցնենք՝ Մկրտչյանը երեկ լուսանկար էր հրապարակել ու գրել էր. «Այս պահից սկսած դադարեցնում եմ Մանվել Գրիգորյանի պաշտպանությունը նրա՝ զինվորի կամ ազատամարտիկի հացը յուրացնելու մեղադրանքի մասով, նման մեղադրանքն անհիմն հերյուրանք լինելու պատճառով:Մնացած մասով մեղադրանքը թող հուզի այլ մաստի փաստաբաններին: Ես իմ ընտանիքի, հարազատների, ընկերների ու հայրենիքի առջև այլևս արդարանալու բան չունեմ՝ կասկածողները՝ սրիկա են»:

Մկրտչյանն ասաց, որ այս ամբողջ ժամանակաընթացքում ինքը Մանվել Գրիգորյանի շահերի պաշտպանությունն իրականացրել է առաջին հերթին որպես ազատամարտիկ:
Նա մասնավորապես պարզաբանեց. «Կա մի նրբություն՝ ես գործին ներգրավվել եմ իմ սեփական նախաձեռնությամբ, որպես ազատամարտիկ, ԵԿՄ անդամ: Առաջին հարցը, որ ինձ հուզել, հետաքրքրել է՝ գործի մեջ մտնել ոչ այդքան և ոչ միայն որպես Մանվել Գրիգորյանի շահերի պաշտպան, այլ որպես ազատամարտիկների շահերի պաշտպան, որոնք հետաքրքրված էին, թե իրականում այդ մեղադրանքը՝ զինվորի, ազատամարտիկի սնունդ յուրացնելու մասին, որևիցե աղերս ունի՞ իրականության հետ, թե չէ:
Հանրային այն ճնշումը, որը ձևակերպվեց հայտնի անձանց շնորհիվ, պետք էր կամ հաստատել կամ հերքել: Հիմա, երբ նախաքննությունն ավարտվել է, և ես որպես ազատամարտիկ, որը ամենաերկար ժամանակն է անցկացրել Մանվել Գրիգորյանի հետ առանձնազրույցներում, որը ամենագործուն մասնակցությունն է ունեցել նախաքննությանը, որը բացի Մանվել Գրիգորյանի շահերի պաշտպանությունից, զբաղված է եղել նաև սեփական հետաքննությամբ, այսօր իրավունք ունեմ հայտարարել, որ այլևս դրա անհրաժեշտությունը չկա:
Նախաքննության ավարտին արդեն ես հայտարարում եմ, որ չկա որևէ հիմք, փաստ կամ թույլատրելի, վերաբերելի ենթադրություն առ այն, որ Մանվել Գրիգորյանը նման արարք կատարել է: Ինչպես ողջամիտ ուղեղները պնդում էին ամենասկզբում, հերյուրանք է, չի համապատասխանում իրականությանը: Սա ամենակարևորն է, որը հետաքրքրում էր սահման պաշտպանած տղաներին»:
 
Մեր դիտարկմանը, թե Մկրտչյանի գրառումից տպավորություն էր, թե փաստաբանը շինծու է համարում զինվորի սնունդը յուրացնելու մեղադրանքը, մյուս մեղադրանքները հաստատում, փաստաբանը արձագանքեց, որ խոշոր չափի գույք հափշտակելու մասին մեղադրանքը «ամենաքիչն է հուզել սահման պահած տղերքին, ազատմարտիկներին», իսկ գրառումը կատարել է առաջին հերթին հենց նրանց համար:
«Ես գրառումն արել եմ ոչ թե որպես փաստաբան, այլ որպես ազատամարտիկ: Երևի դա պետք է նշեի, որպեսզի թյուրընկալում չառաջացներ: Այս գրառման հեղինակը ոչ թե փաստաբան, այլ ազատամարտիկ Արսեն Մկրտչյանն է: Որպես ազատամարտիկ այդ մեղադրանքի մասին ես այլևս նպատակահարմար չեմ գտնում խոսել դրա մասին, որոհետև չկա նման մեղադրանք, անհիմն է: Գոնե իմ նման ազատամարտիկի մոտ այլևս որևէ կասկած չկա, որ այդ մեղադրանքը շինծու է: Նորմալ երկրի նորմալ դատարանում դատական ապագա չի ունենալու», – հավելեց փաստաբանը:
Ինչ վերաբերում է հետագա քայլերին, Մկրտչյանն ասաց, որ որպես փաստաբան որևէ հիմք չունի Մանվել Գրիգորյանի պաշտպանությունից հրաժարվելու: «Դատաքննության ընթացքում հնարավոր է, որ համապատասխան պայմանագրի հիման վրա շարունակեմ Մանվել Գրիգորյանի պաշտպանությունը», – հավելեց փաստաբանը:
Նշենք, որ Մանվել Գրիգորյանի պաշտպանական խումբը դիմել է Երևանի ընդհանուր իրավասության դատարան՝ գեներալի խափանման միջոց կալանքը գրավով փոխելու համար: Սակայն նիստը երեկ քննիչի բացակայության պատճառով չկայացավ և հետաձգվեց մինչև փետրվարի 26-ը:
 
Source: USAArmenia

Մասին USArmeniaNews.com

Կարդացեք նաև

ՄԻԵԴ-ը տեղյա՞կ է, թե ինչպիսի անմարդկային վերաբերմունք է ցուցաբերվում Գրիգորյանի նկատմամբ

Անարդարություն՝ ընդդեմ գեներալի. Փաշինյանի առաջ կանաչ լույս վառեցին Ինչպես հայտնել են Մարդու իրավունքների Եվրոպական դատարանում …