Երեքշաբթի , 19 Հոկտեմբերի 2021

Ինձ համար դժվար է խոսել Գևորգ Եղիազարյանի մասին անցյալով

Սիրված հաղորդավար, պրոդյուսեր, Գևորգ Եղիազարյանի անակնկալ մահվան բոթը ցնցել է շատ-շատերին: Կյանքից հեռացավ ոչ միայն հայալեզու եթերի հեռուստահաղորդավար՝ բացառիկ իր գրագիտությամբ, կուլտուրայով, խոսքի ճկունությամբ, ուրույն ձեռագրով, այլև մեկն, ով իր մարդկային բարձր որակների շնորհիվ հասցրեց անջնջելի հետք թողնել յուր բազմաթիվ ընկերների, մտերիմների սրտերում՝ դառնալով իսկական ընկերոջ, լավ մարդու անկրկնելի օրինակ:

Անկեղծ ասած՝ չափազանց դժվար է հավատալ, որ Գևորգը՝ կենսախինդ, կյանքով լեցուն այդ հայորդին, այլևս մեզ հետ չէ: Աներևակայելի է, որ այժմ ստիպված եմ Գևորգ Եղիազարյանի մասին խոսել անցյալ ժամանակով, անհավատալի է, որ նա լքել է մեզ՝ հավերժի ճամփորդ դառնալով:
Սփյուռքում ապրողները շատ լավ գիտեն, որ Լոս Անջելեսի լավագույն հաղորդավարներից մեկը հանդիսացող Գևորգ Եղիազարյանը, ով հայտնի էր նաև իր անաչառությամբ ու ճշմարտությունը բարձրաձայնելու քաջությամբ, երկար տարիներ աշխատում էր «ARTN SHANT» հեռուստաընկերությունում՝ հանդիսանալով այն առաջատար մասնագետներից մեկը, որ իսկապես իր լրագրողական գործունեությամբ ծաղկեցնում էր հեռուստաընկերությունը՝ ծառայելով իսկական պրոֆեսիանոլիզմի վառ օրինակ:
Նա հեռուստալրագրության գուրուներից մեկն էր:
Իսկապես ունիվերսալ մասնագիտական որակների տեր մարդ էր, որին կարելի էր տեսնել ինչպես ասենք վերլուծական բնույթի հաղորդումներ, այնպես էլ տարբեր բեմերում համերգներ, անհատական միջոցառումներ վարելիս: Բազմաթիվ հարսանիքներ, կնունքներ ու ծնունդներ են ծաղկել Գևորգի գեղեցիկ խոսքի ներքո՝ դառնալով իսկապես անմոռանալի ոչ միայն հոբելյարների կամ նորապսակների, այլև նույնիսկ խնջույքներին հրավիրված մասնակիցների համար:
Մասնագիտական բարձր ընդունակությունները Գևորգ Եղիազարյանի հաջողության բանալին էին, որոնք օգնում էին նրան ամենուրեք փայլել, շլացնել:
Գևորգի հետ ինքս ունեցել եմ ինչպես ընկերական, այնպես էլ գործընկերային հարաբերություններ: Միասին աշխատել ենք հեռուստամարաթոնի ժամանակ, «Grand Party»-ի կողմից կազմակեպված բարեգործական «Հայ զինվոր» համերգի շրջանակներում էլ ենք համագործակցել, հարցազրույցներ ունեցել և այլն: Նրա կողմից բացմիցս եմ հրավիրվել մասնակցելու նրա հեղինակային «Բումերանգ» հաղորդմանը, սակայն, ցավոք, չէի կարողանում գտնել ազատ ժամանակ՝ հյուրընկալվելու հաղորդաշարին: Խորը ցավ եմ ապրում, որ այդպես էլ չկարողացա Գևորգի հետ մասնակցել հաղորդմանը և հիմա ստիպված եմ մխիթարվելու համար ընդամենը վերընթերցել ու վերլսել նրա՝ ինձ ուղղված հեռախոսային հաղորդագրությունները:
Ցավոք, վերջին շրջանը հայերիս համար կարծես աչքի է ընկնում աննախադեպ կորուստներով, տարբեր տեղերից ստացվող բոթերով: Մի տեսակ մահն է սկսել թևածել ամենուր՝ բոլորիս հիշեցնելով կյանքի ու իրական արժեքների իսկության, դրանց վերաարժևորման անհրաժեշտության մասին:
Գևորգ Եղիազարյանն իսկապես չափազանց երիտասարդ էր՝ հավերժի ճամփան բռնելու համար:
Գայանե Մանուկյան
Source: USAArmenia

Մասին USArmeniaNews.com

Կարդացեք նաև

Պետական ծախսերը վերջին տարիներին յոթ փակի տակ են պահում. մինչդեռ այդ ծախսերը կատարվում են հանրային միջոցներից, եւ հանրությունն իրավունք ունի իմանալու դրանց մասին. «Հրապարակ»

«Հրապարակ». Քովիդ 19-ի երկարաժամկետ տնտեսական հետեւանքների մեղմացման ծրագրի շրջանակներում 2019 թվականին կառավարությունը ստեղծեց Հայաստանի պետական …