Ուրբաթ , 30 Սեպտեմբերի 2022

ՀՅԴ Արևմտեան ԱՄՆի Կենտրոնական Կոմիտէի Պատուիրակութիւնը հանդիպեց Լոսանջելըսում ՀՀ հիւպատոսարանի անձնակազմի հետ


ՀՅԴ պատուիրակութիւնը ապա իր պաշտօնական յուշագիրն է յանձնել հիւպատոսին, արտգործ նախարարին յանձնելու համար: Յուշագրի բովանդակութիւնը նոյնութեամբ տեսնել ստորև:
ՀՀ Արտաքին Գործերի Նախարար Արարատ Միրզոյանին և անձնակազմին
Հայաստանի Հանրապետության վարչապետի գրասենեակին
Երեւան, Հայաստանի Հանրապետություն
Լոս Անջելեսում ՀՀ գլխավոր հյուպատոսության արտակարգ դեսպանորդ և լիազոր նախարար Նազելի Համբարձումեանին ձեռամբ՝
Յ Ո Ւ Շ Ա Գ Ի Ր
Ամէն բանէ առաջ, խստագոյնս կը դատապարտենք թշնամի Ատրպէյճանի նորագոյն նախայարձակումը (agression) Հայաստանի Հանրապետութեան գերիշխան տարածքներուն դէմ, որ շղթայազերծուցեաւ քանի մը օր առաջ։ Յարգանք ու զօրակցութիւն մեր քաջարի բանակին։
Սոյն թուականի Սեպտեմբերի 14ին, ՀՀ վարչապետը յայտարարութեամբ մը ակնարկեց փաստաթուղթի մը ստորագրութեան մասին, որ կ՚առաջադրէ «29,800 քառ. քմ. տարածքով Հայաստանի Հանրապետութեան» եբթադրեալ խաղաղութիւնը։ Նոյն անձը ոչ մէկ խօսք ունի Արցախի ինքնորոշման իրաւունքին մասին, ինչ որ անգամ մը եւս շատ յստակօրէն կը բացայայտէ, թէ ՀՀ ներկայ իշխանութիւնը հրաժարած է Արցախէն։
Սա անընդունելի է մեզի համար, որովհետեւ
Ա) Արցախը իր ինքնորոշման կամքը արտայայտած է օրինական կերպով ու հռչակած է իր անկախութիւնը։
Բ) Արցախի ինքնորոշումը, թէ՛ օրինականօրէն եւ թէ՛ քաղաքականօրէն, համահունչ է հայ-թրքական կնճիռի արդարացի լուծման ռազմավարական նպատակին ու մաս կը կազմէ այդ մեծ փաթեթին։
Գ) Հայկական դիւանագիտութիւնը, յատկապէս 1998-2018 տարիներուն, յաջողած է միջազգային տարազումով քանի մը կարեւոր սկզբունքներ ամրագրել։ Առաջին, Արցախի հարցը բռնի ուժով լուծելու տարբերակի բացառում։ Երկրորդ Արցախի ինքնորոշման իրաւունքի անխախտելիութիւն, որ, դարձեալ Մինսկի խմբակի համանախագահութեան հաստատումով, չի հակասեր հակամարտութեան շուրջ բանակցող երկիրներու հողային ամբողջականութեան սկզբունքը։
ՀՀ ներկայ իշխանութիւնը ոչ մէկ մանդատ ունի հրաժարելու վերոնշեալ սկզբունքներէն, հետեւաբար, այդ ուղղութեամբ իր առած քայլերը կը հակասեն մեր պետութեան ու ազգի շահերուն։
Այս իշխանութիւնը ձախողած է երկրի ազգային անվտանգութիւնը երաշխաւորելու եւ պետութեան ու ազգի գերակայ շահերը պաշտպանելու իր առաքելութեան մէջ։ 44 օրեայ պատերազմէ ետք եւս, այս իշխանութիւնը ոչ մէկ ձեւով փորձեց վերականգնել մեր քաղաքական, դիւանագիտական եւ զինուորական կարողականութիւնը։ Ընդհակառակը, անընդհատ ընթացաւ պետական հիմնական կառյցները կազմաքանդելու եւ թուլացնելու ուղղութեամբ։
Այս իշխանութիւնները պատերազմի բերումով Արցախի գրաւուած տարածքները «դէօկուպացնելու» սուտ խոստումներով խաբեց մեր ժողովուրդը ու վերընտրուեցաւ, իսկ այսօր կը փորձէ օրինականացնել թշնամի Ատրպէյճանի նկրտումները Արցախի Հանրապետութեան նկատմամբ։
Անընդունելի է այն փաստը, որ ՔՊ կուսակցութիւնն ու իր ղեկավար վարչապետը կառչած են իշխանութեան՝ զայն ամէն գնով պահելու բացայայտ վարքագծով, անտեսելով մեր համազգային շահերը, անտեսելով պետութեան կորուստի վտանգը։
Հետեւաբար, ՀՀ վարչապետի պաշտօնին տիրացած անձը ԱՆՅԱՊԱՂ պէտք է հրաժարի, որպէսզի մեր ժողովուրդը կարենայ կազմել նոր իշխանութիւն, որ իր կարգին ատակ ըլլայ՝ առաջին՝ սպասարկելու Հայաստանի Հանրապետութեան, Արցախի Հանրապետութեան եւ համայն հայութեան ազգային շահերը, երկրորդ՝ փրկելու պետութիւնը կործանումի բացայայտ վտանգէն։ Յանուն այս երկու կէտերուն մեր պայքարը մենք պիտի շարունակենք վճռականօրէն։ Կը վստահեցնենք Ձեզի։

ՀՅԴ Արեւմտեան Ամերիկայի Կեդրոնական Կոմիտէ
15 Սերպտեմբեր 2022
Կլենտէյլ
Source: USAArmenia

Մասին USArmeniaNews.com

Կարդացեք նաև

Նիկոլ Փաշինյանը ամենաբարձր միջազգային հարթակից Արցախը հանձնեց Ադրբեջանին. Մետաքսե Հակոբյան

hraparak.am Արցախի խորհրդարանի ընդդիմադիր «Արդարություն» խմբակցության պատգամավոր Մետաքսե Հակոբյանի խոսքով, վարչապետ Նիկոլ Փաշինյանը ՄԱԿ-ի բարձր …

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով