ԲԴԽ-ն արձագանքում է Ռուբեն Վարդազարյանին
Fri, 27 Feb 2026 17:45:25 +0400
«Հրապարակի» հետ զրույցում ԲԴԽ նախկին նախագահ Ռուբեն Վարդազարյանն ասել էր, որ ԲԴԽ-ի ուղիղ գործառույթն է՝ պաշտպանել եւ պահպանել դատական իշխանության անկախությունը բոլոր տեսակի հարձակումներից, անկախ նրանից, թե ում կողմից է, եթե նույնիսկ փաստաբաններն են հարձակվում դատական իշխանության վրա, կամ ինչ-որ վտանգ է սպառնում։ Նա հավելել էր, որ այստեղ խնդիրն այն չէ, որ ԲԴԽ-ն պաշտպանում է դատավորին, խնդիրն այն է, որ այս դեպքում «միակողմանի է այդ պաշտպանությունը` երբ իշխանությունն է հարձակվում, չեն պաշտպանում, երբ վարչապետն ասում է՝ դատական իշխանությունը լեգիտիմ չէ, ոչ ոք ձայն չի հանում, բայց փաստաբաններին թիրախավորում են, փորձում են լռեցնել, որպեսզի չթիրախավորվեն այն դատավորները, կամ այդ դատական ակտերը քննադատության առարկա չդառնան»։ Ռ.Վարդազարյանի այս դիտարկումը խնդրեցինք մեկնաբանել ԲԴԽ մամուլի խոսնակ Ծովինար Խաչատրյանին․ «Արդեն երկու օր է տարբեր լրատվամիջոցներով պարոն Վարդազարյանը հնչեցնում է այն միտքը, որ Դատական իշխանության օրը գործադիրի ղեկավարի կողմից դատական իշխանությունը համարվել է ոչ լեգիտիմ ու ԲԴԽ նախագահը դրան չի պատասխանել։ Խնդրում եմ նորից դիտել 2026 թվականի հունվարի 12–ին Դատական իշխամության օրվան նվիրված միջոցառման տեսագրության պանելային քննարկման հատվածը, որտեղ էլ, ըստ Ռուբեն Վարդազարյանի, հնչել է լեգիտիմությանը վերաբերող նախադասություն։ Դատական իշխանության լեգիտիմությունը պանելային քննարկման մասնակիցներից որևէ մեկի կողմից կասկածի տակ չի դրվել»։ Հիշեցնենք, որ քննարկումը վարել է ԲԴԽ անդամ Երանուհի Թումանյանցը, պանելային քննարկմանը մասնակցել է ԲԴԽ նախագահ Արթուր Աթաբեկյանը։