«Ճիշտ չէ՝ արտահայտությունները մանիպուլացված, ձեւախեղված բերել ներկայացնել որպես բացարձակ ճշմարտություն»,- ասել է աշխատանքի եւ սոցիալական հարցերի նախարարի պաշտոնը զբաղեցնող Թորոսյան Արսենը` ի պատասխան «Կառավարությունում, ի վերջո, քննարկեցի՞ք, հասկացա՞ք, թե թոշակառուներն ինչպես կարող են 10 հազարը ծախսել, որ որոշեցիք 10 հազարով ավելացնել թոշակները» հարցին։ Կարծում եմ, որ այստեղ առկա չէ որեւէ մանիպուլացում կամ ձեւախեղում: Հատկապես որ լրագրողները դժվար թե ի վիճակի լինեն մրցակցել մանիպուլյացիայի «մաստեր կլաս» ցուցադրող վարչապետի ու նրա թիմակիցների հետ:

Եվ հատկապես որ կենսաթոշակներն ավելացնելու փոխարեն, երբ մարդիկ «չէին իմանալու», թե ինչպես դա ծախսեն, այդ միջոցներն առողջապահության ապահովագրությանը հատկացնելու որոշումն ավելի քան ոչ ադեկվատ տարբերակ էր: «65+» տարեկան մարդկանց դեպքում նորմալ սնունդ ու ձմռանը բնակարանում նորմալ ջերմություն ունենալն ավելի կարեւոր է, քան դրանց բացակայության դեպքում առաջացած հիվանդությունների բուժումը: Էլ չասած լուրջ պրոցեդուրաների առումով շաբաթներ կամ նույնիսկ ամիսներ տեւող հերթերի հանգամանքի մասին: Կարծում եմ, որ դա այն է, ինչ պետք է բժշկական կրթությամբ նախարարը բացատրեր իր վերադասին, որպեսզի վերջինս առաջին երկու երեւույթները՝ սնունդը եւ ջեռուցումը, չհակադրեր երրորդին՝ առողջապահության ապահովագրությանը:

Ես հասկանում եմ, որ երկու անգամ «մեծարգո վարչապետ պարոն Փաշինյանի» վստահությունը կորցրած ու «վերին» կամքով վերականգնած նախարարի համար անհնար բան է լինելու նրան խորհուրդներ տալը, որովհետեւ հայտնի է, որ վերջինս ամենագետ է եւ փորձագետի մակարդակ ունեցող անձ՝ կենսագործունեության համարյա բոլոր ոլորտներում կամ էլ՝ առանց «համարյա»-ի: Իսկ եթե այնուամենայնիվ պարզվում է, որ վերջինս ինչ-որ բանի առումով սխալ բան է ասել կամ արել՝ դա էական չէ, քանի որ ունի դրա հիմնավոր արդարացումը. ինքն այլեւս չի հիշում: Այս առումով է, որ լրագրողներին մանիպուլյացիայի ու ձեւախեղման մեջ մեղադրող նախարարը պետք է ճիշտ հասցեագրեր ասելիքը:

Անցնենք նախարարի պաշտոնը զբաղեցնող անձի եզրափակիչ մտքին: «Ես չեմ կարծում, որ մեր որեւէ քաղաքացի այլ բան է հասկացել, քան նկատի են ունեցել վարչապետը եւ մենք՝ կառավարության նիստերում քննարկելիս»,- ասել է նա։ Իսկապես, որպես ՀՀ քաղաքացի եւ այն էլ «65+» տարեկան, կարող եմ վկայել, որ ես հասկացել եմ այն, ինչ ցանկացել է կարեւորել նախարարին պաշտոնի նշանակած Փաշինյանը, ինչը եւ ներկայացրի հոդվածի սկզբում: Շուտով 8-րդ տարին կլրանա, ինչ նա բազմել է վարչապետի պաշտոնին, սակայն իսկապես 7 տարի, ինչպես ինքն է ասել, մնացել է առաջին դասարանում: Իհարկե, ասվածն այլ համատեքստում է հնչել, բայց խնդիրն այն է, որ, անկախ իրենից, ինքը ներկայացրել է իր գործունեության մասին ողջ ճշմարտությունը:

Վերջում փորձեմ ըստ էության պատասխանել փաշինյանական՝ «տունը տաքացնելու վրա լրացուցիչ 10 հազարը ծախսելու, երբ այդ տունը չունի կարգին դուռ ու պատուհան» դարակազմիկ մտքին: «Խրուշչովյան» շենքի երկսենյականոց մեր բնակարանը վերանորոգել ենք շուրջ 20 տարի առաջ: Ու, փառք Աստծո, դեռեւս չկա ո՛չ դռան եւ ո՛չ էլ պատուհանի ճեղք, որպեսզի միջանցիկ քամի փչի: Սակայն Երեւանը գտնվում է կլիմայական առումով մերձարեւադարձային գոտու հյուսիսային մասում՝ ծովի մակերեւույթից 850-1300 մետր բարձրության վրա՝ բնութագրվելով չոր ցամաքային կլիմայով: Նոր Նորք թաղամասի բարձրությունն էլ երեւի մոտ է հենց 1300 մետրին, ինչը նշանակում է, որ կարող են լինել ձմեռային ամիսներ, որ բավական ցուրտ լինեն նախորդ տարիների համեմատությամբ: Ու չնայած դռներում ու պատուհաններում ճեղքերի բացակայությանը՝ բնակարանի ջեռուցման համար ծախսվող գումարը կարող է էականորեն տարբերվել միջինացված ինչ-որ գումարից: Ու 10 հազար դրամն էլ գնա դրան:

Ենթադրում եմ, որ արդեն 8-րդ տարին քաղաքի կենտրոնում՝ կենտրոնացված ջեռուցման պայմաններում բնակվող Փաշինյանը դա չի գիտակցում: Վատ չէր լինի, եթե նորքեցիները մեկ մարդու նման՝ հունիսի 8-ին քվեարկեին ոչ թե փաշինյանական ՔՊ-ի, այլ ընդդիմադիր որեւէ դաշինքի օգտին, ինչը կստիպեր, որ Փաշինյանն ի վերջո վերադառնար հայաստանյան իրականություն՝ սեփականը ստեղծելու փոխարեն: Ու գիտակցեր, որ առողջապահության ապահովագրությանը հատկացվող գումարը չի կարող իրենով փոխարինել սննդի, ջեռուցման եւ բարեկեցիկ ապրելու համար անհրաժեշտ այլ ծախսերը: