«Քանի որ վերջին օրերին շատ հարցեր են հնչում՝ ինչո՞ւ որոշեցինք համագործակցել Միասնության թևեր քաղաքական նախաձեռնության հետ, նպատակահարմար եմ համարում հրապարակային անդրադառնալ այդ որոշման հիմքերին։

Վերջին ամիսների ընթացքում մենք հանդիպել և քննարկումներ ենք ունեցել գրեթե բոլոր քաղաքական դերակատարների հետ՝ բացառությամբ խորհրդարանական եռյակի։ Այդ հանդիպումներն ու բանակցությունները տևել են ամիսներ, երբեմն՝ օրեր, սակայն դրանց զգալի մասը կամ որևէ հեռանկար չէր բացում պետության կայուն և ինքնիշխան զարգացման համար, կամ ակնհայտորեն տանում էր ձայների փոշիացման։ Իհարկե այդ ճանապարհին եղել են մարդիկ, ում հետ մենք հասցրել ենք ընկերանալ կամ շատ հարգում ենք և ընդունում, սակայն այս պահին իրենց դիրքորոշումները միայնակ կամ կոնկրետ նեղ գծի շուրջ շարունակելու իրենց գործունեությունը ի զորու չէին հասնելու էական փոփոխությունների։

Արման Թաթոյանի գլխավորած թիմի պարագայում իրավիճակը հենց սկզբից հստակ էր․ սա նախկին–ներկա համակարգը կոտրելու ձգտող՝ նոր, երիտասարդ և պրոֆեսիոնալ կադրերով համալրված ուժ է, որը Հայաստանի ապագան չի պատկերացնում ոչ անցյալի արատավոր բարքերի վերադարձով, ոչ էլ ներկայի սխալների շարունակմամբ։

Այս ուժը ջատագով է խաղաղության, բայց ոչ թուլության հաշվին, այլ՝ սեփական ուժի և արժանապատվության վրա հիմնված խաղաղության։ Այստեղ հավաքված են մարդիկ, ովքեր իրենց ամենօրյա աշխատանքով՝ որպես արդարության մարտիկներ, արդեն ապացուցել են, որ գործում են և շարունակելու են գործել ի շահ Հայաստանի։

Մոտ երկու ամիս տևած բանակցությունները, տարբեր գործընկերների դիտարկումները և ներքին քննարկումները մեր թիմին հստակ համոզմունք տվեցին, որ Արման Թաթոյանը իրապես Հայաստանի թեկնածուն է և առաջնորդվում է բացառապես Հայաստանի պետական և հանրային շահերով։

Այս փուլում Հայաստանի շահը առաջ տանող ամենաիրատեսական քաղաքական բևեռը հենց Միասնության թևեր նախաձեռնությունն է, և այս որոշումը պատահական չէր, այն արդյունք է երկար ճանապարհի, ծանր ընտրության և հստակ արժեքային դիրքավորման»,- «Առաջ» արժանապատվության շարժման համակարգող Լևոն Չուկակլյան։

Միասնության թևեր