11 ժամ ապօրինի պահել են կալանավայրում
Wed, 04 Mar 2026 19:45:00 +0400
Երեկ տեղեկացրել էինք, որ ուրբաթ օրվանից Վահագն Չախալյանի ինքնազգացողությունը վատացել է՝ երիկամի քարը շարժվել է եւ նա շտապ բուժօգնության կարիք ունի։ Սակայն կալանավայրի ադմինիստրացիան բժիշկ չի հրավիրել, ՔԿՀ բժիշկն ընդամենը ցավազրկող է ներարկել, իսկ վիճակը գնալով վատացել է։ Չախալյանի պաշտպան Վրեժ Խաչիկյանը մեզ հետ զրույցում հաստատել էր այս տեղեկությունը, ասելով, որ նոր է դուրս եկել կալանավայրից, պահանջել է, որ պատշաճ բուժօգնություն ցուցաբերեն։ Նա ասել էր, որ վաղը` այսինքն, այսօր Չախալյանին կազատեն ՔԿՀ-ից եւ նա կտեղափոխվի տնային կալանքի, սակայն մեկ ամբողջ օր այդ վիճակում մարդուն չի կարելի թողնել, դա կարող է անդառնալի հետեւանքներ ունենալ։
Հիշեցնենք, որ նախորդ շաբաթ Բագրատ արքեպիսկոպոս Գալստանյանի և մյուսների` «18 արդարների» գործով մեղադրյալ Վահագն Չախալյանի խափանման միջոց կալանքը փոխվել էր։ Երևանի ընդհանուր իրավասության քրեական դատարանը՝ դատավոր Կարեն Ֆարխոյանի նախագահությամբ, որոշել էր Չախալյանի նկատմամբ որպես խափանման միջոց կիրառել տնային կալանքը՝ համակցված բացակայելու արգելքով։
Այսօր մենք կրկին կապ հաստատեցինք փաստաբան Վրեժ Խաչիկյանի հետ, հասկանալու համար, թե ի՞նչ վիճակում է Չախալյանը և ե՞րբ կալանավայրից կգնա տուն: Փաստաբանը մեզ հետ զրույցում ասաց. «Մեծ կրակի մեջ ենք ընկել: Ուրբաթ երեկոյան Չախալյանի ցավերը սկսվեցին, նոր միայն երեքշաբթի օրը հետազոտել են նրան: Աբսուրդն այն է, որ մարդուն առավոտյան 10:30 պետք է ազատ արձակեին, որպեսզի գնար տուն` տնային կալանքի, բայց դատավորը գրել է ներառյալ մարտի չորսը: Օրենքով պետք է արդեն նա տանը լիներ, սակայն ստացվում է, որ 11 ժամ ավել է մնալու Քրեակատարողականում: Զանգահարել եմ ՄԻՊ-ի գրասենյակ, նրանք էլ չեն հասկանում, թե օրենքը ինչ է ասում: Փաստացի մարդուն 11 ժամ ապօրինի պահում են կալանավայրում: Երեկվա դրությամբ նա ցավերի մեջ էր», – ասաց փաստաբանը: