Լարված իրավիճակ. «Կարգի չհրավիրեք, ես եմ անելու»
Thu, 05 Mar 2026 11:49:34 +0400
Ազգային ժողովում ընթացող նիստի ժամանակ լարված միջադեպ տեղի ունեցավ ընդդիմադիր և իշխանական պատգամավորների միջև։
«Հայաստան» խմբակցության պատգամավոր Քրիստինե Վարդանյանը ելույթի ընթացքում հարցեր ուղղեց Հակակոռուպցիոն կոմիտեի նախագահ Արթուր Նահապետյանին։ Նա հետաքրքրվեց Սերգեյ Բագրատյանի կնոջ հետ կապվող հանքի գործունեությամբ, ինչպես նաև ԱՆԻՖ-ի շուրջ շրջանառվող ֆինանսական հարցերով։
Ելույթի ժամանակ իշխող խմբակցության պատգամավոր Սերգեյ Բագրատյանը տեղից արձագանքում էր, ինչին Վարդանյանը պատասխանեց՝ կոչ անելով նրան հանգստանալ՝ նշելով, որ իր խոսքում հղում է անում լրագրողական հետաքննության տվյալներին։
Նիստը վարող Ազգային ժողովի փոխխոսնակ Հակոբ Արշակյանը պատգամավորներին հորդորեց տեղից չմիջամտել ելույթին և պահպանել կարգապահությունը։
Վարդանյանը իր ելույթում անդրադարձավ նաև Աջափնյակում մետրոյի նոր կայարանի կառուցման խոստմանը՝ հիշեցնելով, որ տարիներ շարունակ դրա մասին հայտարարվել է, սակայն ծրագիրը մինչ այժմ չի իրականացվել։ Նա քննադատեց նաև իշխանությունների հակակոռուպցիոն քաղաքականությունը՝ պնդելով, որ մեծահարուստների դեմ պայքարի փոխարեն նրանց տրամադրվում են հարկային և մաքսային արտոնություններ, իսկ հետագայում այդ շրջանակների ֆինանսական միջոցները ուղղվում են տարբեր ծրագրերի միջոցով։
Պատգամավորը խոսեց նաև երկրում տարածված թմրանյութերի խնդրի մասին՝ հարց բարձրացնելով, թե արդյոք այդ ոլորտում նույնպես կոռուպցիոն ռիսկեր կան։ Նրա խոսքով՝ իշխանությունները հաճախ տեղեկացված են ընդդիմադիրների գործունեությունից, սակայն չեն կարողանում կանխել դպրոցների հարևանությամբ թմրանյութերի վաճառքը։
Ելույթի ընթացքում Վարդանյանը անդրադարձավ նաև Գյումրիում անցկացված ընտրություններին՝ նշելով, որ իշխանությունները չեն բողոքարկել դրանց արդյունքները և հարց բարձրացնելով, թե ինչի դեմ են այժմ պայքարում։
Ազգային ժողովի նախագահ Ալեն Սիմոնյանը հայտարարեց, որ պատգամավորի ելույթի համար հատկացված ժամանակն ավարտվել է։ Վարդանյանը փորձեց շարունակել խոսքը՝ նշելով, որ իրեն ընդհատել են և ցանկանում է ավարտել միտքը։
Սակայն Սիմոնյանը արձագանքեց, որ նիստի ընթացքը ինքն է վերահսկում և պատգամավորին խնդրեց ավարտել ելույթը և նստել իր տեղը։ Դահլիճում շարունակվող արձագանքներից հետո նա հորդորեց պատգամավորներին պահպանել կարգուկանոնը և չխանգարել նիստի աշխատանքին։
Այնուհետև ԱԺ նախագահը դիմեց «Հայաստան» խմբակցության քարտուղար Արծվիկ Մինասյանին՝ կոչ անելով կարգի հրավիրել խմբակցության անդամներին։ Նրա խոսքով՝ անթույլատրելի է դահլիճից դուրս գտնվող պատգամավորների կողմից նիստի ընթացքին միջամտելը կամ նախագահողին հրահանգներ տալը։
«Ձեր խմբակցությանը կարգի հրավիրեք։ Պարոն Ղազարյանը իրեն իրավունք է վերապահում դահլիճ չմտած աստիճանավանդակից ինձ հրահանգներ է տալիս, մյուս պատգամավորը ասում է՝ ես կորոշեմ, երբ եմ խոսալու։ Կարգի հրավիրեք ձեր խմբակցությունը, թե չէ ես կարգի կհրավիրեմ։ Չհամարձակվեք մտնել ԱԺ նիստերի դահլիճ, աստիճանավանդակից կարգուկանոն թելադրել»,- ասել է Սիմոնյանը: