ԱԺ-ում կայացած խորհրդարանական ճեպազրույցների ընթացքում «Հայաստան» խմբակցության պատգամավոր Գառնիկ Դանիելյանը անդրադարձել է Հայաստանում անցկացված հասարակական հարցումների արդյունքներին և քննադատել դրանց օբյեկտիվությունը։

Պատգամավորը նշել է, որ երկրում ձևավորվել է վախի մթնոլորտ, երբ մարդիկ կարող են խնդիրների բախվել նույնիսկ սոցիալական ցանցերում արտահայտած կարծիքների կամ ֆեյսբուքյան «լայքերի» համար։ Նրա խոսքով՝ նման պայմաններում դժվար է խոսել իրական և անկաշկանդ հանրային կարծիքի մասին։

Դանիելյանի կարծիքով՝ այդ իրավիճակի պատճառով շատ քաղաքացիներ խուսափում են ընտրությունների վերաբերյալ հարցերին պատասխանելուց։ Նա նաև տեղեկացրել է, որ իրենց քաղաքական ուժը նույնպես անցկացրել է սեփական հարցումները, որոնց արդյունքները զգալիորեն տարբերվում են հրապարակված տվյալներից։

Ըստ պատգամավորի՝ իրենց ուսումնասիրությունների համաձայն՝ իշխանությունը ներկայացնող Քաղաքացիական պայմանագիր կուսակցությունը իշխանությունը պահպանելու իրական հնարավորություն չունի, քանի որ ունի բարձր հակավարկանիշ։ Նրա խոսքով՝ քաղաքական դաշտում արդեն ձևավորվել են մի քանի բևեռներ, որոնք ավելի մեծ աջակցություն ունեն։

Դանիելյանը նաև նշել է, որ իրենց անցկացրած հարցումները և քաղաքացիների հետ հանդիպումները ցույց են տալիս, որ ընդդիմադիր ուժերի համախումբը կարող է ավելի շատ ձայներ ստանալ, քան վարչապետ Նիկոլ Փաշինյանը։ Նա ընդգծել է, որ իրենց քաղաքական ուժի վարկանիշը բավականին բարձր է։

Հիշեցնենք, որ Միջազգային հանրապետական ինստիտուտը (IRI) հրապարակել է Հայաստանում իրականացված հարցման արդյունքները։ Այդ հարցման համաձայն՝ եթե խորհրդարանական ընտրությունները կայանային հաջորդ կիրակի, ապա հարցվածների պատասխանները կբաշխվեին հետևյալ կերպ․
• Քաղաքացիական պայմանագիր – 24%
• «Ուժեղ Հայաստան» – 9%
• «Հայաստան» դաշինք և Հայ Յեղափոխական Դաշնակցություն – 3%
• Բարգավաճ Հայաստան – 3%։