Ինչն է խանգարում առողջ ու երջանիկ ծերությանը
Fri, 06 Mar 2026 23:00:10 +0400
Միայնակությունն ու սոցիալական մեկուսացվածությունը լուրջ խնդիրներ են իրենցից ներկայացնում տարեց մարդկանց համար՝ իրենց ծերությունն առողջ ու երջանիկ անցկացնելու առումով։ Այս մասին հայտնում են ճապոնացի գիտնականները։ Համաձայն հրապարակված գիտական հոդվածի, մեկուսացումն ու միայնակությունը կարեւոր գործոններ են, որոնք բացասաբար են ազդում տարեցների վրա։
Մինչդեռ տարիքին համեմատ՝ ֆիզիկական ակտիվությունը, առողջ սննդակարգը, սոցիալական ներգրավվածությունը զգալիորեն բարելավում են տարեցների առողջական վիճակը։ Միայնակությունից եւ սոցիալական մեկուսացվածությունից ազատվելու տարբեր առաջարկներ են գիտնականներ ներկայացրել՝ սկսած ավանդական՝ հարեւանների հետ շփումներից, միմյանց տուն այցելելուց եւ միասին ժամանակ անցկացնելուց, մինչեւ հատուկ տարեցների համար ստեղծված ժամանցային կենտրոններ եւ ակումբներ հաճախելը։ Հաղորդակցության առումով կարեւոր է նաեւ ֆիզիկապես առեւտրի կենտրոններ այցելելն ու գնումներ կատարելը։ Նշենք, որ Ճապոնիան աշխարհի ամենից երկարակյաց բնակչություն ունեցող երկրներից է եւ այստեղ հաճախ են գիտական ուսումնասիրություններ կատարում՝ կյանքի տեւողության եւ երկարակեցության որակական բարելավման ուղղությամբ։