Ադրբեջանը բեմականացրել էր Նախիջևանի վրա դրոնով հարձակումը
Sat, 07 Mar 2026 21:15:00 +0400
Նախիջևանի վրա դրոնով հարձակումը բոլոր նախանշաններով բեմականացված էր: Անդրադառնալով Նախիջևանի վրա իրանական դրոնով հարձակմանը «Հրապարակի» հետ զրույցում ասաց ՀՀ արտակարգ և լիազոր դեսպան Ձյունիկ Աղաջանյանը:
«Բեմականացված իրավիճակ էր, քանի որ զուտ պատկերների տեսակետից շատ նման էր 44-օրյա պատերազմի ժամանակ գեղեցիկ զետեղված հրթիռի պատկերին, հատկապես երբ որ տեսանյութում ակնհայտ էր ընդհանուր պատկերով, որ պատրաստի կանգնած հրշեջ մեքենաներ կային: Պտտվող մարդկանցից տպավորություն էր, որ ինչ-որ բանի են սպասում և երբ որ եղավ, իրենց հանձնարարված գործողությունները սկսեցին անել շտապողաբար, իբրև թե օգնություն ցույց տալու և կարծեմ պայթյունի հզորությունն այնպիսին չէր, ինչպիսին պիտի լիներ նման հրթիռի պայթյունի ծավալն ու հզորությունը»,-ասաց Աղաջանյանը:
Իրավիճակի վերլուծությունից կարելի է եզրակացնել, որ սա նախապատրաստական աշխատանք էր, հնարավոր ադրբեջանական կամ Ադրբեջանից հնարավոր ներգրավվածության առումով և պատահական չէր, որ հենց Նախիջևանի հատվածն էր ընտրված, որովհետև Նախիջևանի կողմից նախ մուտքն է հեշտ, բացի այդ, այդ օդանավակայանում բավականին շատ կուտակված ինքնաթիռներ կան, որոնք չգիտես ինչու անօդաչու սարքի թիրախում չհայտնվեցին ու անվնաս տարածքի էր արդյունքում հարվածել, դիվանագետը շեշտում է, որ այս առումով պետք է հասկանալ, որ սա դիվանագիտական աշխատանք է, եթե իրավիճակը թույլ տա, որպեսզի ըստ ծրագրի, և ադրբեջանական կողմից, և թուրքական կողմից դեպի Իրան գործողություններ իրականացնեն:
«Սրանք նաև զուգակցենք Ինջիրլիկի հետ կապված վերջին դեպքերը, երբ որ առաջինի պարագայում հստակ նշվեց, որ դա կեղծ տեղեկատվություն է, որ հրթիռը Միջերկրական ծովի կողմերն էր հասել, և երկրորդի պարագայում ևս իրանական կողմը նշեց, որ իրենց կողմից գործողություն չի եղել դա՝ իսրայելական սադրանք է և մենք չենք կարող բացառել, որ դա հենց իրականություն է, հաշվի առնելով, որ իրանական կողմը չի խուսափում իր հարվածների մասին բացահայտ խոսելուց»,- նկատեց Աղաջանյանը:
Ամերիկյան և արևմտյան լրատվամիջոցները տարածեցին տեղեկություններ ամերիկացի հարյուրավոր զինվորականների բողոքների մասին, որ իրենց ասել են, որ սա սրբազան պատերազմ է Իրանի դեմ, և դրա հաղթական ավարտից հետո Հիսուսն է գալու: Դիվանագետը նշում է, որ նման թեզերի տարածումը պայմանավորված է նրանով, որ ամերիկյան կողմը շատ լավ հասկանում է, որ իր բերած փաստարկներն ու գործողությունները ամենևին չեն օրինականացնում հարձակումն Իրանի դեմ, հետևաբար փորձում է ինչ-որ մի թեզ գտնել, որը կարող է հանրային աջակցության ինչ-որ դաշտ ստեղծել, հատկապես մղել զինվորներին հանուն ինչ-որ բանի Իրանի դեմ պայքարելու:
«Իրենք շատ լավ հասկանում են, որ նույն զինվորականների համար էլ ակնհայտ էր, որ Իրանը ԱՄՆ-ի համար վտանգ չէր ներկայացնում, ավելին, պատրաստ էր բանակցություններով խնդիրներ լուծելու և առաջին տարին չէր, որ Իրանը նման շատ կառուցողական մոտեցում էր ցուցաբերում: Իր միջազգային պարտավորություններով պայմանավորված իր իրավունքները պաշտպանելով հանդերձ: Եվ այս պարագայում իրենք շատ լավ հասկանում են, որ իրենց ուղղակի կրակի բերան են տալիս, ավելին, իրենք ունեն նախորդ փորձը, որի վրա սերունդ էլ չի անցել, իրենք տեսել են և Իրաքը, և Աֆղանստանը, և այդ գործողությունների ապարդյունությունը, և դրանց ձախողումը, ինչը հարված է հասցրել իրենց հեղինակությանը: Իրենք նաև տեսել են, թե ինչպես են իրենց տարբեր թեզերով, նաև խաղային մեթոդներով փորձում փաստացիորեն հանցագործություններ կատարել և սպանությունների գնալ՝ անմեղ քաղաքացիական բնակչության և իրենցից շատերը չեն ուզում դրան մասնակից լինել, բնականաբար, ինչի ակնհայտ դրսևորումը մենք տեսանք երեկվա Կոնգրեսի քննարկումների ժամանակ, երբ իրենց սպաներից մեկին քաշքշելով դուրս հանեցին: Սակայն, նրա խոսքերը, կարծում եմ, արձագանքում են, թե զինվորականության, թե ամերիկյան հասարակության գերազանց մեծամասնության մեջ»,-եզրափակեց Ձյունիկ Աղաջանյանը: