Իմիտացիոն հարձակումներ
Sat, 07 Mar 2026 21:45:00 +0400
Մեր հարևան Իրանի վրա ամերիկյան և իսրայելական ռմբահարումների ու հրթիռակոծումների շրջանակում վերջին մի քանի օրը Հայաստանում լայնորեն քննարկվող հարցը իրանական ԱԹՍ-ների գրոհն էր Նախիջևանի ուղղությամբ: Ավելի ճիշտ գրոհի իմիտացիան, քանի որ 4 անօդաչու սարքից երկուսն ընկել էին դաշտում, մեկը օդանավակայանի կից կառույցի վրա, մեկն էլ դպրոցի մոտակայքում: Ներկայացված պատկերը վկայում է, որ իրականում ոչ մի հարձակում էլ չի եղել: Որովհետև անցել են այն ժամանակները, երբ իրանական «շահեդները» թիրախից տասնյակ կամ նույնիսկ հարյուրավոր մետր հեռու էին հարվածում: Եվ, բացի դրանից, ո՞րն էր, այնուամենայնիվ, «շահեդների» թիրախը: Պարզ է, որ դա երկրորդական կարգի քաղաքացիական օդանավակայանը չէր և ոչ էլ դպրոցը կամ էլ ինչ-որ դաշտ:
Բայց երբ նկատի ենք ունենում Ադրբեջանի ղեկավարության և հատկապես Իլհամ Ալիևի ռեակցիան, ապա դա ավելի սազում էր սադրանքից հետո բռունցք թափահարելուն: Ինչն, ի դեպ, «չշշկռվելիք գերագույնի» շնորհիվ Իլհամը սովորություն է դարձրել 2021 թվականից այս կողմ: Այս հարցում համատեղվում են Ադրբեջանի, Թուրքիայի և, ինչու չէ, նաև ԱՄՆ-ի շահերը: Մեղադրել Իրանին և հակաքայլ կատարելու միջոցով կրկին ակտիվացնել Իրանի հյուսիս, հյուսիս-արևելյան մասի ադրբեջանական բնակչության ցանկությունը միանալաու «մայր» Ադրբեջանին: Ինչն առաջին անգամ դրսևորվել էր նախորդ դարի 90-ականների սկզբներին Խորհրդային Միության կազմաքանդվելուց հետո: Երբ հյուսիսից ու հարավից մարդիկ հատեցին Ադրբեջան-Իրան սահմանը, և մի քանի օր այն գոյություն չուներ:
Ի դեպ, հենց նույն օրը (կամ օրերին) հայտնի դարձավ, որ իրանական հրթիռը հատել է Թուրքիայի սահմանը: Ինչը կրկին օգտագործվեց ընդդեմ Իրանի, սակայն այդ դեպքում պաթոսը շատ ավելի թույլ էր: Որովհետև Իրանի տարածքի նկատմամբ Թուրքիան նկրտումներ չունի: Եվ բացի դրանից, եթե հրաշք պատահեր ու Իլհամին հաջողվեր մասնատել Իրանը, կծագեր երկրի արևելքում բնակվող քրդերի անկախության կամ գոնե ինքնավարության հարցը, ինչը բացարձակ ձեռ չի տալիս Թուրքիային: Իսկ որ Իլհամը նման նկրտումներ ունի, վկայում է Իրանի ղեկավարությանն ուղղված մեղադրանքի բովանդակությունը: Ըստ որի, որպես ահաբեկչական հարձակումների թիրախ, ԱԹՍ-ներից բացի, եղել են Բաքու-Ջեյհան նավթատարը, Ադրբեջանում Իսրայելի դեսպանատունը, լեռնային հրեական համայնքի և Աշքենազի սինագոգի առաջնորդներից մեկը: Եվ խիստ զարմանալի պատահականությամբ, «ահաբեկիչները» ձերբակալվել են Նախիջևանում ԱԹՍ-ների անհաջող հարձակումից անմիջապես հետո:
Բայց քանի որ 44-օրյա պատերազմի հաղթանակից խիստ ոգևորված Իլհամը որոշել է բաց չթողնել հարմար պահը և փորձել Ադրբեջանին միացնելու ադրբեջանցիներով բնակեցված Իրանի հյուսիսային տարածքը, ապա ամեն ինչ էլ կարող էր տեղի ունենալ: Ու ԱՄՆ-ում Ադրբեջանի դեսպանն էլ կարող էր հայտարարել, որ «Ադրբեջանն ու Միացյալ Նահանգները սերտ կապի մեջ են Նախիջևանի վրա իրանական անօդաչու թռչող սարքի հարձակման հետ կապված»: Հայաստանի ԱԳՆ ղեկավարն էլ պետք է ադրբեջանցի գործընկերոջն անհանգստությունը հայտներ միջադեպերի առնչությամբ: Բաքվից էլ շնորհակալություն հայտնեին նման անհանգստութւյուն հայտնած երկրներին և այդ թվում Հայաստանին: Չնայած ՀՀ-ում Իրանի դեսպանությունը մեղադրել է Բաքվին Նախիջևանին հարվածելու իմիտացիայի կազմակերպման մեջ: Ու ճիշտ է արել, քանի որ բացահայտվել է, որ Նախիջևանի ուղղությամբ արձակված իբր իրանական ԱԹՍ-ի վրա երևում է ադրբեջաներեն գրառում:
ՀԳ. Քանի որ խոսվեց իմիտացիայի մասին, ապա չեմ կարող չհիշատակել ՀՀ ԱԱԾ շենքի ուղղությամբ կեսգիշերին ենթադրաբար «Մոլոտովի կոկտեյլի» իմիտացիոն արձակումը: Որ հետո պետք է կապեին Սամվել Կարապետյանի անվան հետ: Ու վստահաբար կփորձեն դա օգտագործել, որպեսզի արգելեն «Ուժեղ Հայաստան» կուսակցության մասնակցությունն ԱԺ ընտրություններին: Ինչն էլ, վստահաբար, կողջունվի ողջ Արևմուտքի կողմից: