Ադրբեջանը տեքստ էր հրապարակել՝ նշելով այն երկրների դրոշները, որոնք ցավակցել ու իրենց աջակցությունն էին հայտնել Նախիջևանում, իբրև թե իրանական դրոնի հարվածի հետ կապված:

Չնայած Իրանը պաշտոնապես հայտարարեց, որ Ադրբեջանի կամ Նախիջևանի ուղղությամբ որևէ հարված իրանական ուժերի կողմից չի եղել, սակայն ադրբեջանական ուժերը շարունակում են հայտարարել, որ իրանական կողմը ահաբեկչական հարձակումներ էր նախատեսել Ադրբեջանում, որոնք, սակայն, իրենք վնասազերծել են:

Քաղաքագետ Արա Պողոսյանը «Հրապարակի» հետ զրույցում ասաց, որ Ադրբեջանի հայտարարությունը երկակիություն ունի, բացահայտելի չէ, թե արդյոք ներկայացված երկրներն իսկապե՞ս Ադրբեջանին զորակցող հայտարարություն են կատարել, թե՞ պարզապես Ադրբեջանն այդպես ներկայացրել է բոլոր այն պետություններին, որոնք այս կամ այն կերպ ուղղակի զանգահարել են կամ մտահոգություն են հայտնել:

«Ես կարծում եմ, որ կարող է սադրանք լինել և Ադրբեջանը բավականին շահագրգռված է լինելու, որպեսզի հայ-իրանական հարաբերությունները հնարավորինս վտանգվեն, որպեսզի հայ-իրանական հարաբերությունները Ադրբեջանի համար զարգանան այն ուղղությամբ, որպեսզի Իրանը հայտնվի լիակատար մեկուսացման մեջ: Սրանով պայմանավորված, ես անձամբ չէի շտապի համարել, որ ՀՀ իշխանությունները զորակցել են և այդ ժեստը չէի մեկնաբանի ընդդեմ Իրանի Իսլամական Հանրապետության դեմ կատարված ժեստ»,- նշում է քաղաքագետը:

Պողոսյանը բնականաբար չի բացառում նաև, որ իշխանությունների անձնական պարտավորություններից ելնելով, կարող է հիպոթետիկ նման վարկած լինել, բայց այս պահին հատկապես հեռախոսազրույցից հետո տարածված հաղորդագրությունը այդ մասին չէր, որ Հայաստանը զորակցում է Ադրբեջանին, այլ այն մասին էր, որ Հայաստանը մտահոգված է տարածաշրջանում էսկալացիայի հնարավոր զարգացման հեռանկարից:

Ինչ վերաբերում է իրանական կողմի գնահատականին այդ հաղորդագրությունում նաև Հայաստանի հիշատակմանը, Պողոսյանը կարծում է, որ դա կախված կլինի Հայաստանի իշխանությունների վարքագծից, թե ինչպիսին կլինի այդ վարքագիծը հետագայում և այս օրերին:

«Իրականում Իրանն այս պահին թեպետ բավականին խառնակ շրջանում է, Իրանը բավականին բուռն տարածաշրջանային ու միջազգային իրադարձությունների հորձանուտում է հայտնվել, բայց միաժամանակ նշեմ, որ Իրանում տարբեր պաշտոնյաներ գոհ չեն Հայաստանի վարքագծից, հատկապես հաշվի առնելով, որ նույնիկ Ադրբեջանի բռնապետը գնաց Բաքվում ԻԻՀ դեսպանատուն, բայց Հայաստանի Հանրապետության վարչապետը, որքան տեղյակ եմ, չի ցավակցել դեսպանատանը, ինչը ևս ժեստ է: Հատկապես Արևելքում այդ ժեստերը շատ նուրբ են ընկալվում և այսպիսի ժեստերը Արևելքի համար բավականին զգայուն են»,-եզրափակեց Արա Պողոսյանը: