Կարող է վտանգվել բոլորի կողմից սպասված կարևոր համակարգը
Tue, 10 Mar 2026 11:08:36 +0400
Բժիշկ Գևորգ Գրիգորյանը նորից անդրադարձել է առողջության համընդհանուր պարտադիր ապահովագրության ներդրման ընթացքին՝ քննադատելով գործընթացի կազմակերպման որոշ կողմեր։
Նա նշում է, որ ծրագրի մեկնարկից արդեն երեք ամիս է անցել, սակայն միայն հիմա են քննարկվում բուժաշխատողների շրջանում ԱրՄեդ համակարգի կիրառման և դրա լիարժեք տիրապետման հարցերը։ Գրիգորգյանի կարծիքով՝ նման խնդիրները պետք է լուծված լինեին մինչև ծրագրի գործարկումը։
Բժիշկը նաև ընդգծում է, որ մասնագետների մի մասը դեռևս սկզբից էր զգուշացնում՝ առողջապահական համակարգը լիարժեք պատրաստ չէ ապահովագրական համակարգի ներդրմանը։ Նրա խոսքով՝ խոսքը վերաբերում է ոչ թե քաղաքական կամ նախընտրական հարցերին, այլ ոլորտում առկա գիտելիքային, տեխնիկական և ռեսուրսային խնդիրներին։
Գրիգորգյանի գնահատմամբ՝ նման լայնածավալ ծրագրերը պետք է սկսվեն միայն այն դեպքում, երբ նախապես գնահատված են համակարգի և մասնագետների իրական հնարավորությունները։ Հակառակ դեպքում, նրա համոզմամբ, «մեծ ռեֆորմի» անվան տակ կարող է վտանգվել բոլորի կողմից սպասված կարևոր համակարգի արդյունավետ ներդրումը։