Ինչ են գողացել Պանթեոնից. ինչ է սպասվում
Tue, 10 Mar 2026 12:08:24 +0400
Ակտիվիստ Էդուարդ Հայրումյանը հրապարակել է Երևանի Պանթեոն 1-ից արված մի շարք լուսանկարներ և անդրադարձել այնտեղ առկա խնդիրներին։
Նրա խոսքով՝ ժամանակին պանթեոնում գտնվող հուշաքարերից շատերը ունեցել են բրոնզից պատրաստված կիսանդրիներ, լուսանկարներ կամ այլ հուշատախտակներ, սակայն դրանք գողացվել են։ Հայրումյանը նշում է, որ նման դեպքերը սկսվել են հատկապես 1994 թվականից հետո, երբ այդ բրոնզե տարրերը ապամոնտաժվել և վաճառվել են որպես մետաղի ջարդոն։
Ակտիվիստը շեշտում է, որ այս գործողություններին մասնակցել են հասարակության տարբեր ներկայացուցիչներ՝ ինչպես գողացողները, այնպես էլ նրանք, ովքեր ընդունել կամ ձուլել են գողացված մետաղը։ Նրա համոզմամբ՝ հասարակությունը պետք է հստակ դիրքորոշում արտահայտի նման վարքագծի նկատմամբ և գնահատի այն մարդկանց աշխատանքը, ովքեր փորձում են պահպանել և խնամել պատմական հուշակոթողները։
Հայրումյանը նաև կոչ է արել քաղաքացիներին միանալ նախաձեռնությանը և մարտի 14-ին՝ առավոտյան ժամը 09:00-ից, այցելել Պանթեոն 1՝ տարածքի մաքրման և բարեկարգման աշխատանքներին մասնակցելու համար։