Պահանջում եմ, որ Սուրեն Պապիկյանը ներողություն խնդրի հանրությունից և հրաժարական տա
Tue, 10 Mar 2026 20:45:00 +0400
Այսօր «Միասնության թևեր» քաղաքական նախաձեռնության անդամները բողոքի ակցիա անցկացրին ՀՀ պաշտպանության նախարարության շենքի դիմաց։ Ակցիայի ընթացքում մասնակիցները գերատեսչությանը փոխանցեցին մի փաստաթուղթ, որն արձանագրում է Ադրբեջանի զինված ուժերի նոր ներխուժումները Հայաստանի Հանրապետության ինքնիշխան տարածք։ Փաստաթղթում ներառված են տվյալներ ադրբեջանական կողմի դիրքային առաջխաղացումների, ամրացումների և համապատասխան կոորդինատների վերաբերյալ։ Հիշեցնենք, որ Ադրբեջանի ԶՈւ-ի նոր ներխուժումների մասին տեղեկատվությունն ավելի վաղ հրապարակել էր նախաձեռնության ղեկավար, նախկին ՄԻՊ Արման Թաթոյանը։
«Միասնության թեւեր» քաղաքացիական նախաձեռնության համահիմնադիր Դավիթ Անանյանը, «Հրապարակի» հետ զրույցում խոսելով թեմայի մասին, ասում է. «Ակցիան պլանավորված էր` որպես շարունակություն օրեր առաջ «Միասնության թևեր» քաղաքացիական նախաձեռնության ղեկավար Արման Թաթոյանի հայտնի, հրատապ ասուլիսի շրջանակներում ներկայացրած փաստական հանգամանքների հետ, ըստ որի` ադրբեջանական զինված ուժերը դիրքային առաջխաղացում են ունեցել 2025 թվականի ամռանը` հուլիսի 31-ից, օգոստոսի 19-ից ընկած ժամանակահատվածում` առնվազն երկու ուղղություններով` Գեղարքունիքի և Ջերմուկի հատվածներում: Այս ամենին ի պատասխան Պաշտպանության նախարարն իրեն թույլ է տվել անվանարկել և պնդել է, թե Արման Թաթոյանը ստում է: Դրան հաջորդեցին մեր հորդորները և պահանջները, որպեսզի մերկապարանոց հայտարարությունների փոխարեն արվեն փաստական հայտարարություններ` եթե սուտ է, ապա պետք է ներկայացնեն փաստեր, ըստ որոնց` Թաթոյանի ներկայացրած տեղեկությունները չեն համապատասխանում իրականությանը: Այս ամենին հաջորդեց անկախ լրագրողների հետաքննությունը, որի համաձայն հրապարակվեցին նաև ԶԼՄ-ների կողմից ձեռքբերված արբանյակային լուսանկարներ, որոնք ևս հաստատեցին մեր ներկայացրած տեղեկությունները: Այս ամենին էլ հաջորդեց մեր երիտասարդական թևի արդար զայրույթը: Ակցիայի նպատակն այն էր, որ եթե պաշտպանության նախարարը տեղյակ չէ, թե ինչ է կատարվում, չունի ճշգրիտ տեղեկություններ տեղանքային նկարագրությունների վերաբերյալ, ապա չունի անելիք: Նրանք պարտավոր են այդ տեղեկությունները տրամադրել հանրությանը: Ես պահանջում եմ, որ ՊՆ Սուրեն Պապիկյանը ներողություն խնդրի հանրությունից և հրաժարականի դիմում ներկայացնի: Չի կարող ստեղծվել պատրանք, որ 2026-ին այս խղճուկ իշխանությունը մարդկանց խաբի, թե իբրև խաղաղություն է բերում: Խաղաղությունը չի կարող քողարկվել լռությամբ և վախերով: Չտեսնելու տալով, կամ պայմանավորվածություններ ձեռք բերելով, չի կարող այնպես լինել, որ Ադրբեջանը ներթափանցի մեր ինքնիշխան տարածք: Մենք լինելու ենք հետևողական և գնալու ենք մինչև վերջ»: