1.800.000 դրամով լեղապարկ են վիրահատո՞ւմ
Wed, 11 Mar 2026 12:23:05 +0400
Բժիշկ Գևորգ Գրիգորյանը անդրադարձել է առողջապահության նախարար Անահիտ Ավանեսյանի հրապարակած տեսանյութին՝ ներկայացնելով մի շարք հարցադրումներ և քննադատություններ։
Գրիգորյանի խոսքով՝ նախարարի հրապարակման մեջ քաղաքացու կողմից հնչեցված տեղեկությունը, ըստ որի լեղապարկի վիրահատությունը կարող է արժենալ շուրջ 1 միլիոն 800 հազար դրամ և այդ գումարը փոխհատուցվում է պետության կողմից, իրականությանը չի համապատասխանում։ Նա նշում է, որ առողջապահական ապահովագրական հիմնադրամի հաստատած պաշտոնական գնացուցակում լեղապարկի հեռացման վիրահատության արժեքը սահմանված է մոտ 300 հազար դրամ։
Բժիշկը նախարարությունից պահանջում է պաշտոնապես պարզաբանել մի քանի հարց։ Մասնավորապես՝ նա հետաքրքրվում է, թե Հայաստանի որ բժշկական կենտրոնում է լեղապարկի հեռացման վիրահատությունն իրականացվում 1 միլիոն 800 հազար դրամ արժողությամբ։ Բացի այդ, նա հարց է բարձրացնում՝ արդյոք նախարարությունը լիարժեք տիրապետում է իր իսկ հաստատած գնացուցակին։
Գևորգ Գրիգորյանը նաև պնդում է, որ նման տեսանյութերի հրապարակումը կարող է մոլորեցնել քաղաքացիներին և բուժաշխատողներին։ Նրա կարծիքով՝ եթե նախարարությունը չտրամադրի հստակ պարզաբանումներ, ապա կարող է առաջանալ տպավորություն, որ ներկայացված տեղեկատվությունը իրականությանը չի համապատասխանում կամ մանիպուլյացիայի տարրեր է պարունակում։