«Մենք փակել ենք… սոված, սննդի կարոտ թոշակառուի էջը Հայաստանում: Դա փաստ ա…»: Հասկացաք, չէ՞, որ սա ՀՀ ստախոս վարչապետի հայտարարություններից է: Ավելին ասեմ՝ նա այս հայտարարությունն անելիս Հայաստանի Հանրապետության պուճուր քարտեզի «բրոշկայով» էր, ինչը նշանակում է, որ Շիրակի մարզ կատարած «թափառայցի» օրերին է ասել: Մի քիչ էլ մանրամասնեմ… ՔՊ-ական թափառախմբակը երկար սեղանի շուրջ թեյ էր խմում, որ ստախոս վարչապետը, Պապիկյանի ու Սանոսյանի արանքում նստած, այս բանն ասաց: Իմ ֆեյսբուքյան էջում այդ կադրերը կան, կարող եք հենց հիմա էլ դիտել… Ռուբինյանը, Միրզոյան Արոն… Գրեթե բոլորը կան այդ կինոյում եւ համերաշխ՝ գլխով են անում, որ, այո, ՔՊ-ն փակել է սոված, սննդի կարոտ թոշակառուի էջը:
Մեկ էլ Բաքվում են այսպես հավաքվում, միասին «չայ» խմում ու էշ-էշ դուրս տալիս իմացած-չիմացած բաների մասին: Եղել եմ Բաքվում, գիտեմ: Մեր համալսարանի թիմով գնացել էինք մրցումների: Մեզ մի հանրակացարանում էին տեղավորել, որի առաջին հարկում «չայխանա» կար: Սրանք մեզ երեկոյան հրավիրեցին միասին չայ խմելու: Մեծ կապույտ թեյնիկներ կային… Դրին սեղանի գլխին, բաժակները շարեցին ու… Սկսվեց: Մի բաժակ խմեցի… Կողքիս նստածն իսկույն երկրորդը լցրեց, առանց որեւէ բան հարցնելու: Դա էլ խմեցի: Սա ձեռքը տարավ թեյնիկին որ երրորդը լցնի, հրաժարվեցի՝ շնորհակալ եմ, չեմ ուզում: Զգացի՝ նեղվեց… Դե, ուրեմն, բաժակդ շուռ տուր, որ իմանամ՝ չես ուզում: Տրադիցիա է: Սովետական ժամանակներ էին, եւ չայի սեղանի շուրջ էշ-էշ դուրս տվողներ քիչ կային: Իրենց համալսարանի մասին էին պատմում, իրենց քաղաքի, աշխատավոր ժողովրդի ու պարծենում, որ սաղ Սովետի նավթն իրենք են տալիս: Մենք էլ տակ չմնացինք… Ատոմակայան ունենք, ոսկի, մոլիբդեն, Սովետի ամենալավ կոնյակը…
Եվ, ուրեմն, «չայխանում» նստած, մի շրջան կազմած՝ չայ էին խմում ՔՊ-ի մեծերը եւ լսում ամենամեծի դուրս տված հիմարությունները: Տրադիցիա է… Չէ, ոչ միայն խմբակային «չայ» խմելը, այլեւ ՔՊ-ի ամենամեծին լսելն ու գլխով անելը: Բոլորը համամիտ էին, որ փակել են սոված, հացի կարոտ թոշակառուի էջը: Եվ սա՝ այն դեպքում, որ թոշակառուն այդ փրկության փրկոց 10 հազարը դեռ չի ստացել ու վստահ էլ չէ, որ կստանա: Մի խոսքով՝ տեսնենք, թե ինչ է լինելու, որովհետեւ մինչեւ ապրիլի 1-ը դեռ բավականին ժամանակ կա սննդամթերքի եւ առաջին անհրաժեշտության ապրանքների գներն այնքան բարձրացնելու, որ ՔՊ-ի դրոշակին գրված այդ 10 հազարը դառնա ոչինչ: Հաջորդիվ սրանք «չայխանայում» այսպես փակելու են նաեւ առողջապահական ծառայությունների, գազի, լույսի, ջրի կարոտ թոշակառուների էջը:

Իսկ ինչո՞ւ եմ ասում, որ այս ամենն ավելին չէ, քան էշ-էշ դուրս տալը: Եկեք հիշենք, թե ՔՊ-ի ամենամեծն ուրիշ ինչ հայտարարություններ է արել՝ տարատեսակ էջեր փակելու մասին: Ստեփանակերտում էշ-էշ հայտարարեց, որ Արցախի պատկանելության էջը փակված է՝ «Արցախը Հայաստան է, եւ վերջ»: Ավելի ուշ, երբ հրավիրել էին Պրահայում «չայ» խմելու, նոր հայտարարություն արեց. «Արցախն Ադրբեջան է, եւ վերջ»: Ի՞նչ իմանամ, գուցե «չայի» սեղա՞նն է վատ ազդում այս մարդու վրա: Մարտի 1-ի «անմեղ զոհերի» ընտանիքներին մի քանի միլիոն փող տվեց ու հայտարարեց՝ վերջ, մարտի 1-ի գործն ըստ էության եւ ամբողջությամբ բացահայտված է: Իբր՝ հարցը փակված է: Ու մեկը չկա, որ հարցնի՝ եթե այդ էջը փակված է, դու ինչո՞ւ ես դրսում: Այդ օրերի բոլոր տեսանյութերն ու արածդ կոչերը քո դեմ են խոսում, ախր…

Մի առիթով էլ, թե՝ մեր երկրում օլիգարխների էջը փակված է, բոլորը դարձել են բարեխիղճ հարկատուներ: Շուրջներդ նայեք մի հատ… Շունը պոչը ոնց շարժում է, ՔՊ-շնիկ օլիգարխի է դիպչում: Ինչքան ԱԺ-ում են, երկու այդքան՝ կառավարությունում: Տենդեր շահելն էլ են դարձրել ՔՊ-շնիկների կամ նրանց հետ ասոցացվող գործարարների մենաշնորհ: Ներմուծման-արտահանման ոլորտում բարգավաճող օլիգարխների մասին էլ չեմ խոսում:
Կոռուպցիայի էջը փակելու մասին չմոռանամ ասել: Մի ժամանակ այնպես էին փակել այդ էջը, որ կոռուպցիան անվերադարձ փախել էր մեր երկրից: Տառացիորեն մեկ ամիս առաջ ՊԵԿ-ում շռնդալից բաներ տեղի ունեցան, ստեպ-ստեպ ՊՆ-ում են բաներ բացվում, անցյալ օրն էլ Մանկավարժական համալսարանում էր «բռնոցի»: Սա ամբողջ ցանկը չէ, իհարկե, բայց վկայում է այն մասին, որ մեր երկրում կոռուպցիա, այնուամենայնիվ, կա եւ՝ շատ: Չբզբզեմ, չէ՞, թե ինչպես են մարդիկ ՔՊ ցուցակ խցկվում: Մուծվիր եւ խցկվիր, ավելի շատ մուծիր եւ ավելի խորը խցկվիր, այսինքն՝ առաջին կամ երկրորդ տասնյակ… Ամեն ինչ շատ պարզ է:

Եվ, իհարկե, չեմ կարող չխոսել ՔՊ ռահվիրայի ամենաաղաղակող հայտարարության մասին: Մի տեղ «չայ» խմելուց է ասել. «Մեր երկրում ընտրակեղծիքների էջը փակված է»: Ըղո՞րթ… Դուք որ ընտրակեղծիք չանեք, կարո՞ղ եք գոնե ԺԷԿ-ի պետ ընտրվել: Ինձ մեկ հատիկ ՔՊ-շնիկ ցույց տվեք, որի հանրային գործակիցը բացասական թիվ չէ: Սկսեք ամենամեծ ՔՊ-շնիկից: Բոլորիդ ճակատին մեծ-մեծ տառերով դաջված է՝ դավաճան, հողատու, կապիտուլյանտ, օտարի գործակալ, անհավատ, տիրադավ, պառակտիչ, ստախոս… Միով բանիվ՝ ԱՆԴՈՆ: Եվ դուք ասում եք, որ կարող եք արդար ընտրություններով ընտրվե՞լ: Ո՞ւմ եք խաբում, ի՞նձ: Ես ձեր կաշին դաբաղխանից գիտեմ, ախր: Դուք ամեն ինչ անելու եք, որ վերարտադրվեք վարչապետի աթոռին եւ արդարացնեք ձեր օտար տերերի սպասելիքները: Սկսած լույսերն անջատելուց եւ վերջացրած ավտոբուսներով «ընտրողների» շրջիկ խմբեր պտտելով: Երաշխիք կա՞, որ բանակն ու ոստիկանությունը հրամանով չեն ընտրելու: Դատախազություն, ԱԱԾ, ՊԵԿ, նախարարություններ, կրթական հաստատություններ, ԲԿ-ներ, հրաշքով ողջ մնացած ստեղծագործական միություններ ու գրանտակեր ՀԿ-ներ… Ինչի՞ համար է այս մոբիլիզացիան, եթե ոչ ընտրություններն ամենաբարձր մակարդակով կեղծելու եւ հետո ժողովրդին հիմարացնելու, թե ձեզ ժողովուրդն է ընտրել:

Այս անգամ չի ստացվելու, պարոնայք ՔՊ-շնիկներ: Կարող եք հանգիստ խղճով զեկուցել ձեր տերերին, որ վիճակը «ճանտռակուլի» է, եւ առանց ընտրակեղծիքների չեք կարողանալու շեֆին պահել վարչապետի աթոռին: Ասեք, որ ձեզ ընտրակեղծարարության նոր, Հայաստանում դեռ չտեսնված գործիքներ ու մեթոդներ են պետք, շատ փող եւ շռնդալից միջոցառումներ… Տեսեք՝ չուշանաք:

Իսկ ինչ վերաբերում է ինձ, ապա ես ընտրելու եմ այնպիսի իշխանություն, որ գա ու Հայաստանում առաջինը փակի Էրդողանի, Քըլըչի, Ալիեւի եւ ՔՊ-ի կոալիցիոն գարշահոտության էջը, էշ-էշ ճամարտակելու էջը, ժողովրդի ու ազգի պառակտվածության էջը, խեղճության, թուլության, անապահովության զգացողությունների էջը: Ես մերժելու եմ մահվան իշխանությունը, որ ստեղծագործ աշխատանքը, ապահով կյանքն ու արժանապատիվ խաղաղությունը վերջապես մտնեն մեր տուն: