«Մասնակցային բյուջետավորում 2026թ.» ծրագիրը Տավուշի մարզի համայնքներում մեծ աղմուկ առաջացրեց։ Համայնքապետարանները գովազդում էին, որ մասնակցային բյուջետավորման գործընթացը քաղաքացիներին հնարավորություն է տալիս անմիջականորեն մասնակցել համայնքային բյուջեի մի մասի բաշխմանը եւ իրենց համայնքի զարգացմանը վերաբերող որոշումների կայացմանը՝ ձեւավորելով ավելի պատասխանատու եւ ներառական տեղական ինքնակառավարում։ Այսինքն, բնակչությունը պետք է ծրագրեր առաջարկեր, դրանք քննարկվեին` հավանության արժանանային եւ իրականացվեին տեղական ինքնակառավարման մարմինների կողմից:

Համայնքների բնակավայրերից ներկայացված ծրագրերի հեղինակներն էլ իրենց բարեկամներին, ծանոթներին, անգամ՝ անծանոթներին խնդրում էին համայնքապետարանի ինտերնետային էջը մտնել եւ քվեարկել իրենց ներկայացրած ծրագրի օգտին, որպեսզի այն շատ քվեներ ստանա, հաղթող ճանաչվի ու իրականացվի։ Ստացվեց Եվրատեսելի կամ երգի մրցույթների քվեարկության նման մի բան։ Սակայն «Մասնակցային բյուջետավորում» ծրագիրն իրականում նորույթ չէր, այն անցյալ տարի եւս իրականացվել է։ Այդ ծրագրին քաղաքացիների մասնակցությունը կարեւոր է ծրագրային առաջարկներ ներկայացնելու, համայնքի զարգացմանը վերաբերող որոշումների կայացմանը մասնակցելու առումով, սակայն քաղաքացիները պետք է ուշադիր եւ հետեւողական լինեն այդ ծրագրերով համայնքներում կատարված աշխատանքների որակի, ծրագրի նախագծին դրանց համապատասխանության առումով։

Դիտարկենք «Մասնակցային բյուջետավորում» ծրագրի շրջանակներում Դիլիջան քաղաքի Գետափնյա փողոցում խաղահրապարակի կառուցման ծրագիրը։ Դիլիջանի համայնքապետարանի ինտերնետային կայքի «Հաշվետվություններ» բաժնում ներկայացված աշխատանքների թվում է նաեւ որպես մասնակցային բյուջետավորմամբ ձեւավորված եւ սուբվենցիաներ ստացած ծրագրերի հաշվետվությունը, որը ներկայացվել է Դիլիջան համայնքի ղեկավար Դավիթ Սարգսյանի կողմից տարածքային կառավարման եւ ենթակառուցվածքների նախարարություն: Այդ ծրագրերի մեջ է նաեւ Դիլիջանի Գետափնյա 74 շենքին հարակից տարածքում բազմաֆունկցիոնալ խաղադաշտի կառուցման հաշվետվությունը, որին կից փաստաթղթում որպես ծրագրի նպատակ նշված է․ «Կառուցել բազմաֆունկցիոնալ խաղադաշտ, որտեղ կարող են զբաղվել սպորտով ոչ միայն երեխաները, այլ նաեւ՝ մեծահասակները։ Կարեւոր է նշել, որ խաղադաշտը տարբեր մարզաձեւերի համար է, այդ թվում` ֆուտբոլի, բասկետբոլի, վոլեյբոլի համար նախատեսված իրենց ատրիբուտներով, ինչը զգալիորեն կբարձրացնի առողջ ապրելակերպի տարածումը եւ զարգացումը Դիլիջանում։ Ծրագրի իրականացումը կխթանի հանրային առողջությունը համայնքում, եւ կբարելավվեն ենթակառուցվածքները»:

Որպես ծրագրի շահառու՝ նշված են Դիլիջան բնակավայրի տվյալ թաղամասի ավելի քան 1100 բնակիչները։ Ծրագրի կապալառուն Աշտարակ քաղաքում գրանցված «Վեռանժ» ՍՊԸ-ն է։ Դիլիջանի Գետափնյա 74 շենքին հարակից տարածքում բազմաֆունկցիոնալ խաղադաշտի կառուցման ծրագրի սկիզբը նշված է 2025թ․ հունվարի 1-ը, ծրագրի ավարտը՝ 2025թ․ դեկտեմբերի 31-ը։ Ծրագրի արժեքը 18 միլիոն 935 հազար 633 դրամ է։ Նախատեսված էր ձեռք բերել, տեղադրել 3 հատ նստարան, յուրաքանչյուրը՝ 60 հազար դրամով, 2 աղբաման, յուրաքանչյուրը՝ 10 հազար դրամով, 2 վոլեյբոլի ցանց, յուրաքանչյուրը՝ 16 հազար 500 դրամով, 2 հատ բասկետբոլի վահանակ՝ ցանցով, յուրաքանչյուրը՝ 53 հազար 80 դրամով, 2 հատ ֆուտբոլի դարպաս՝ ցանցով, յուրաքանչյուրը 250 հազար դրամ արժեքով։

Ծրագրի հաշվետվության մեջ ներկայացված է կառուցված խաղադաշտի 2 լուսանկար, որոնց մեջ հստակ երեւում է, որ խաղադաշտում նստարանները տեղադրված են, ֆուտբոլի դարպասները ցանցով պատված չեն։ Լուսանկարներից ակներեւ է, որ նորակառույց խաղադաշտի շրջակայքը կարիք ունի բարեկարգման։ Ահա, մասնակցային բյուջետավորմամբ կիսատ-պռատ արված մի ծրագիր՝ Դիլիջանի Գետափնյա փողոցի բնակիչների համար։