Եթե սա նախընտրական գովազդ էր, ամառային զորակոչն էլ թող կրճատեին
Thu, 19 Mar 2026 12:30:04 +0400
Կառավարության շենքի դիմաց զինվորների ծնողները շարունակում են բողոքի ակցիա իրականացրել՝ բարձրացնելով պարտադիր զինծառայության ժամկետի կրճատման հարցը։
Ակցիայի մասնակիցներից մեկը նշել է, որ չի ցանկանում հավատալ, թե ծառայության ժամկետի կրճատման որոշումը նախընտրական նպատակներով է արվել։ Նրա խոսքով՝ եթե դա իսկապես նման նպատակ է ունեցել, ապա տրամաբանական կլիներ նույն մոտեցումը կիրառել նաև ամառային զորակոչի նկատմամբ՝ այդ կերպ ավելացնելով աջակցությունը քաղաքացիների կողմից։
Միաժամանակ նա ընդգծել է, որ իրենց հիմնական պահանջը մնում է անփոփոխ՝ կրճատել 2025 թվականի ամառային զորակոչի զինվորների ծառայության ժամկետը նույնպես ։ Ծնողի խոսքով՝ այս պահին իրենց որդիները գտնվում են դիրքերում և տեղյակ չեն տեղի ունեցող իրադարձություններից, իսկ իրենք՝ որպես ծնողներ, բարձրացնում են հարցը՝ համարելով, որ ներկայիս իրավիճակը արդար չէ։
Բողոքի ակցիայի ընթացքում ծնողները նաև դիմում են ներկայացրել Կառավարությանը՝ պաշտոնապես փոխանցելով իրենց պահանջներն ու դժգոհությունները։
«Եթե սա նախընտրական գովազդ էր, լավ կանեին, որ ամառային զորակոչն էլ կրճատեին»,- նշել են նրանք: