Պատրաստվեք նախկին դառնալուն
Fri, 20 Mar 2026 11:07:01 +0400
«Միասնության թևեր» շարժման համակարգող Արման Թաթոյանը հերթական անգամ քննադատության է ենթարկել վարչապետ Նիկոլ Փաշինյանին՝ արձագանքելով նրա հայտարարություններին և մեղադրելով նրան հասարակությանը պատերազմի վտանգով ճնշելու մեջ։
Թաթոյանի խոսքով՝ անթույլատրելի է ընտրությունների թեման կապել Հայաստանի դեմ նոր հարձակման վտանգով։ Նա նշել է, որ նման ձևակերպումները փաստորեն սպառնալիք են հայ ժողովրդի հասցեին և չեն բխում երկրի ղեկավարի պաշտոնին համապատասխան վարքից։
Նրա գնահատմամբ՝ Հայաստանում պատերազմի պատասխանատվությունը կրում է հենց գործող իշխանությունը։ Թաթոյանը հայտարարել է, որ վերջին տարիների պատերազմները, պարտություններն ու ծանր հետևանքները կապված են ներկայիս քաղաքական ուժի գործունեության հետ, և պնդել է, որ պատերազմ հրահրող միակ ուժը հենց իշխանությունն է։
Նա նաև շեշտել է, որ հայ ժողովուրդը պատերազմ չի ցանկանում, ինչպես, իր կարծիքով, այն չի ցանկանում նաև Ադրբեջանի ժողովուրդը։ Սակայն, ըստ Թաթոյանի, նման վարչակարգերի դեպքում պատերազմը հաճախ օգտագործվում է որպես իշխանությունը պահպանելու միջոց։
Շարժման համակարգողը Փաշինյանին մեղադրել է ադրբեջանական սպառնալիքը ներքաղաքական գործընթացներում օգտագործելու, այն ընտրություններում առանցքային գործոնի վերածելու և Հայաստանի ներսում վախի մթնոլորտ ձևավորելու մեջ։ Նա նաև պնդել է, որ գործող իշխանությունը կատարել է քայլեր, որոնք համապատասխանել են Ադրբեջանի շահերին։
Թաթոյանը հայտարարել է, որ երկրի անվտանգությունն ու պետական շահերը չեն կարող ստորադասվել որևէ արտաքին ճնշման կամ իշխանության պահպանման նպատակներին։ Նրա խոսքով՝ Հայաստանի ժողովուրդն արժանի է ապրել խաղաղ երկրում, որտեղ ընտրությունը չի պայմանավորվում պատերազմի վախով։
Վերջում նա ընդգծել է, որ ժողովուրդը պետք է կատարի արժանապատիվ ընտրություն և ունենա այնպիսի ղեկավար, ով առաջնորդվում է բացառապես Հայաստանի շահերով։ Թաթոյանն էլ վստահեցրել է, որ իր համար առաջնայինն ու միակ ուղենիշը Հայաստանի պետական շահն է։
«Դուք պետք է հավաքեք ձեր սրտիկները, պաչիկները ու վախերը և պատրաստվեք նախկին դառնալուն»,- ասել է նա: