Փաշինյանի այցից առաջ Չարենցավանի ակտիվիստներին հրավիրել են քննչական բաժին
Fri, 20 Mar 2026 23:15:03 +0400
Նիկոլ Փաշինյանի «ուրախ ավտոբուսը» շաբաթ և կիրակի օրերին կրկին մարզ է ուղևորվելու, այս անգամ Կոտայքի և Գեղարքունիքի մարզեր։ Մարզպետները հրահանգել են քաղաքապետերին, որ կազմ ու պատրաստ համայնքապետարանում լինեն՝ դիմավորելու Փաշինյանին: Ըստ մեզ հասած տեղեկությունների՝ Չարեցավանում Փաշինյանը կլինի շաբաթ օրվա երկրորդ կեսին: ՔՊ-ի այցից առաջ Չարենցավանում ոստիկանությունը ակցիա իրականացնող պոտենցիալ ակտիվիստներին փորձել է չեզոքացնել` հրավիրելով՝ քննչական բաժին:
Ակտիվիստներից մեկը մեզ հետ զրույցում ասաց, որ սա պատահականություն չէ. «Հունվարի 18-ի դեպքից հետո, երբ մեզ տարան Հրազդանի քննչական բաժին, և 7 ժամ պահելուց հետո բաց թողեցին, վարույթ հարուցելով, բայց մինչև այսօր ոստիկանները մեզ չէին կանչել հարցաքննության: Ասեմ ավելին, մենք մի քանի անգամ ներկայացել ենք Չարենցավանի քննչական բաժին, որ մեզ հարցաքննեն, մեզ ասել են, որ ոչ մի բան էլ չկա, որ պետք լինի կկանչենք: Այսօր Հրազդանի քրեականի տղաներ ծանուցել են, որ վաղը ժամը 3-ին ներկայանանք հարցաքննության: Առհասարակ, երբ կանչում են հարցաքննության, նախապես 2 օր առաջ պետք է մեզ ծանուցեն: Բայց իրենք մեզ այսօր են ծանուցել՝ վաղվա համար: Մենք հասկացանք, որ սա արվում է Փաշինյանի այցից առաջ, քանի որ Փաշինյանը վաղը Չարեցավան է գալիս: Այս անգամ էլ են մեզ ուզում մեկուսացնել»:
Հիշեցնենք, որ հունվարի 18-ին Փաշինյանը Չարենցավան էր գնացել` շրջիկ պատարագի մասնակցելու: