«Քարաքոս» օպերացիան կամ ուղեցույց ընտրություններով տարվածներին
Mon, 23 Mar 2026 15:27:24 +0400
«Քարաքոս» օպերացիան կամ ուղեցույց ընտրություններով տարվածներին
Ընտրությունների անվան տակ Նիկոլ Փաշինյանի ու ՔՊ-ի վերարտադրմանը նախապատրաստվող թեկնածուներին առաջարկում եմ միացյալ հայցադիմումով դիմել ՀՀ և միջազգային դատարաններ՝ Նիկոլ Փաշինյանին դեմ ձևակերպելով հետևյալ մեղադրանքները.
Ա. «Քաղաքացիական պայմանագիր» կուսակցության առաջնորդը լուրջ հոգեկան ու հոգեբանական խնդիրներ ունի, նրա հոգեկան առողջ լինելը վիճարկելի է՝ անհավասարակշիռ վարքի պատճառով, ուստի նրա մասնակցությունը ընտրություններում հավասար պայմաններով` անհնար է:
Հիմնավորումներ: բացահայտ ու ստոր ստախոսություն, մանիպուլյացիա և խաբեբայություն, ՀՀ քաղաքացիներին հոգեբանական տեռորի ենթարկելով իր օգտին գործելու անթաքույց ցուցումներ՝ մոտալուտ պատերազմի սպառնալիքով:
Բ. Նիկոլ Փաշինյանի անհավասարակշիռ վարքը, թեթևամտությունն ու կապկությունները լուրջ վնաս են հասցնում ՀՀ իմիջին միջազգային լսարանի շրջանում, այդ կերպ խախտելով ՀՀ քաղաքացիների իրավունքները, որոնք արտասահմանում ենթարկվում են հեգնանքի ու ծաղրի՝ հենց այդ վարքի պատճառով: Ունենք արձանագրված մի քանի դեպք: Այս կետը հատկապես կարևոր է միջազգային պոտենցիալ ներդրողների մոտ վանող տրամադրություններ ստեղծելու առումով, քանզի երկրի վարչապետի պաշտոնը զբաղեցնող անձը իր թեթևամիտ վարքագծով լուրջ վնասներ է հասցնում ոչ միայն բարոյահոգեբանական դաշտում, այլև նյութական վնաս է հասցնում ՀՀ-ում վստահելի բիզնես միջավայր ձևավորելու և ներդրողներ գրավելու առումով:
Գ. Հազարավոր ՀՀ քաղաքացիներ, մինչ կանխորոշված ելքով ու արդյունքներով ընտրությունների անցկացումը, ստորագրահավաք կարող ենք անցկացնել և միացյալ հայցադիմում ներկայացնել ընդդեմ Նիկոլ Փաշինյանի ու ՔՊ-ի, մեղադրելով վերջիններիս իրենց քաղաքացիական իրավունքները ոտնահարելու, բացահայտ ահաբեկչական մեթոդների կիրառմամբ ընտրություն պարտադրելու, ինչպես նաև ՀՀ քաղաքացիների հոգեկան առողջությունը խաթարելու հիմնավորումներով:
Սա ամենակարճ տարբերակներից մեկն է, որով կարելի է կանխել ՔՊ-ի վերարտադրումը, ուստի առաջարկում եմ 2021 թվականին Նիկոլ Փաշինյանի հրաժարականը պահանջող ՀՀ-ում գրանցված մի քանի հարյուր փաստաբաններին համատեղ ջանքերով կյանքի կոչել օրինական այս գործընթացը՝ անխուսափելի աղետը կանխելու համար:
Հակառակ պարագայում, հիշե´ք, ունենալու եք անպատժելիության զգացումից հղփացած քաղաքական կենդանիներից բաղկացած մի դիկտատուրա, որը հոգեբանական տեռորի ենթարկելով, ձեզ ու ձեր երեխաներին ապահովելու է միմիայն պատանդի ու հպատակի կարգավիճակ:
Հայկ Դեմոյան