Ես՝ որպես Հայաստանի Հանրապետության հարկատու քաղաքացի և Երևան համայնքի բնակիչ, սույնով հանրայնացնում եմ Երևանի քաղաքապետարանի կողմից իրականացվող ոչ իրավաչափ վարչարարության և տոտալ անգործության շղթան, որի նպատակը ոչ թե կայանման կազմակերպումն է, այլ քաղաքացուց բացահայտ «փող քերելը»։

Բախվել եմ մի իրավիճակի, երբ իմ կողմից կատարվել են բոլոր անհրաժեշտ վճարումները՝ առկա են բանկային հավելվածի բոլոր անդորրագրերը։ Համակարգի տեխնիկական խափանման պատճառով վճարումները հաստատվել են սահմանված 15 րոպեից ընդամենը մի քանի րոպե ուշացումով։ Ես, որպես օրինապահ քաղաքացի, դրսևորել եմ բարեխիղճ վարքագիծ ու վճարել տուրքը։ Սակայն Քաղաքապետարանը հաշվի չի առել սա, Վարչարարության համաչափության սկզբունքով առաջնորդվելու փոխարեն՝ վայրկենական նշանակել է 5,000-ական դրամի տուգանքներ։ Սա ոչ թե կարգուկանոն է, այլ պետական մակարդակով իրականացվող «կողոպուտ»։

Մինչ քաղաքապետարանը ոսկերչական ճշգրտությամբ հաշվում է իմ վճարման րոպեները, նույն այդ վայրերում տիրում է տոտալ անօրինականություն։ Կայանատեղիները բացահայտ կերպով «օկուպացված» են անհայտ ծագման արկղերով, աթոռներով ու արգելապատնեշներով։ Անհայտ անձինք, զբաղվելով ապօրինի ձեռնարկատիրությամբ, տարածքն ազատելու համար քաղաքացիներից պահանջում են կանխիկ վճարներ։

Երբ զանգահարում եմ Քաղաքապետարանի թեժ գիծ և պահանջում վերացնել ապօրինի խոչընդոտները իմ վճարած տարածքում, ստանում եմ ցինիկ և անպատասխանատու պատասխան. «Դիմեք ոստիկանություն, մենք պատասխանատու չենք»։
Հայտարարում եմ. Եթե դուք պատասխանատու չեք ձեր իսկ տնօրինության տակ գտնվող և ձեր կողմից տուրք հավաքագրվող տարածքի պատշաճ շահագործման համար, ապա դուք իրավունք չունեք քաղաքացուց գումար պահանջելու կամ նրան տուգանելու։ Ձեր անգործությունը ոչ այլ ինչ է, քան փողոցային «մաֆիայի» բացահայտ հովանավորչություն։

Սա էլ ամենը չէ, հաջորդում են ծանուցման «թակարդը» և ԴԱՀԿ-ի միջոցով իրականացվող տեռորը։ Ինձ տուգանել են, բայց չեն ծանուցել։ Օգտվելով «ՀայՓոստի» փնթի ու անպատասխանատու աշխատաոճից՝ Քաղաքապետարանը թաքուն իրականացնում է վարչական վարույթներ, որոնց մասին ես տեղեկացել եմ միայն այն ժամանակ, երբ ԴԱՀԿ-ն կալանք է դրել իմ հաշիվների վրա։ Սա մարդու իրավունքների կոպիտ խախտում է և բողոքարկման իրավունքից զրկում։ Դուք քաղաքացուն դնում եք թակարդի մեջ՝ ստիպելով վճարել ոչ միայն անհիմն տուգանքը, այլև հարկադիրի ծախսերը։

Հակոբ Մկրտչյան
ՀՀ քաղաքացի