140 մլն եվրոյի պատմությո՞ւն, թե՞ հերթական մանիպուլյացիա. ինչ էր անում Մարթա Կոսը Գյումրիում
Fri, 27 Mar 2026 14:45:13 +0400
ԵՄ ընդլայնման հարցերով հանձնակատար Մարթա Կոսի` նախորդ շաբաթ Գյումրի կատարած այցը, որը պաշտոնապես ներկայացվում էր որպես շփումների ու քննարկումների փուլ, ավարտվեց տեղեկատվական հակասություններով։
Կոսը հանդիպումներ է ունեցել Շիրակի մարզում, այդ թվում՝ Շիրակի պետական համալսարանում, որտեղ շփվել է ուսանողների և դասախոսների հետ։ Նրան հատկապես մեծ ոգևորությամբ ընդունել են Ժուռնալիստների Ասպարեզ ակումբի նախագահ Լևոն Բարսեղյանը և բուհի իշխանամետ ռեկտոր Երվանդ Սերոբյանը։
Պաշտոնական մակարդակում այցը ներկայացվում էր որպես Հայաստան–ԵՄ համագործակցության խորացման հերթական քայլ, ժողովրդավարական ինստիտուտների ամրապնդման և տարբեր ոլորտներում աջակցության ծրագրերի քննարկում։
Սակայն զուգահեռաբար տեղեկատվական դաշտում սկսեցին շրջանառվել այլ բնույթի պնդումներ։
Մասնավորապես՝ որոշ շրջանակներ պնդեցին, թե Կոսը հանդիպումների ընթացքում խոսել է Հայաստանի համար նախատեսվող շուրջ 140 մլն եվրոյի աջակցության մասին՝ այն կապելով «հիբրիդային սպառնալիքների դեմ պայքարի» հետ։ Ընդ որում՝ այս ձևակերպումը ևս տարբեր մեկնաբանությունների տեղիք տվեց՝ սկսած տեղեկատվական անվտանգության ծրագրերից մինչև ներքաղաքական գործընթացների վրա հնարավոր ազդեցության ենթադրություններ։ Արդյունքում առաջ եկան մի շարք հարցեր ու կասկածներ․ արդյո՞ք նման ֆինանսավորման թեման իսկապես քննարկվել է, եթե այո՝ ինչ կոնկրետ ծրագրերի շրջանակում, և ամենակարևորը՝ ինչ է իրականում նկատի ունեցել եվրոպացի պաշտոնյան «հիբրիդային սպառնալիքներ» ասելով։
Միաժամանակ նկատենք, որ ինչպես պատմեցին հանդիպման մասնակիցները, Գյումրիում այցը ուղեկցվել է նաև ոչ ֆորմալ մթնոլորտով՝ տեղական հումորով ու սարկազմով, ինչը ևս տարբեր կերպ է մեկնաբանվել՝ ոմանց համար որպես քաղաքային կոլորիտ, մյուսների համար՝ որպես վերաբերմունք։ Օրինակ՝ տիկին Կոսը պատմել է, որ իրեն խորհուրդ են տվել` գյումրեցիներին հանդիպելիս ասի` փող չկա, չունեն, մինչդեռ ինքը հակառակն է արել, ասել է` փող կա։
Ուշագրավ է, որ եվրոպացի պաշտոնյան մինչ Գյումրի ժամանելը հասցրել էր լինել Շիրակի մարզի մի շարք համայնքներում, որտեղ շիրակցիներին խոստացել է լուծել Եվրոպա մուտքի վիզայի ազատականացման հարցը, որով հայերն ավելի կմոտենան Եվրոպային։
Ինչև, եվրոպացի պաշտոնյան եկավ և գնաց, իսկ գյումրեցիների համար այդպես էլ մինչև վերջ պարզ չդարձավ՝ ինչ էր իրականում հետապնդում այս այցը, և ամենակարևորը՝ ինչ ենթատեքստում պետք է այն ընկալել։