Նիկոլ Փաշինյանի հետ Սուրբ Աննա եկեղեցում միջադեպից հետո ձերբակալված երիտասարդներին դեռևս մեղադրանք չի ներկայացվել։

Հիշեցնենք, որ Սուրբ Աննա եկեղեցում մարտի 29-ին Փաշինյանի մասնակցությամբ միջադեպ է տեղի ունեցել, Փաշինյանի թիկնապահները նախ երիտասարդին քաշելով ճանապարհ են բացել, իսկ երբ երիտասարդը սկսեց բողոքել, թե` ուզում է իր տեղում կանգնած մնալ, վեճ ծագեց։ Ավելի ուշ ոստիկանները ուժի կիրառմամբ եկեղեցուց բերման ենթարկեցին երիտասարդներին։

Միջադեպի առթիվ նախաձեռնվել է քրեական վարույթ՝ Քրեական օրենսգրքի 297-րդ հոդվածի 1-ին մասով (խուլիգանությունը) և 452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելը)։

Ձերբակալվածներն են Դավիթ ու Միքայել Մինասյանները` երկորյակ եղբայրներ, որոնք սովորում են Նիկոլ Աղբալյանի անվան դպրոցի 12-դ դասարանում` գերզանցությամբ, ու հանրային գործիչ Գևորգ Գևորգյանին, ով նույնպես եկեղեցում էր այն պահին, երբ Փաշինյանն իր ուղեկիցներով ժամանեց։ Գեւորգ Գեւորգյանը «Համահայկական ճակատ» շարժման հիմնադիրն է, ռազմական, քաղաքական գործիչ։ Նրան կարելի է տեսնել եկեղեցու պաշտպանության ակցիաներին, Բագրատ սրբազանի նիստերին, անհետ կորած անձանց հարազատների կողքին։ Թե ինչ կապ ունեն դպրոցականները Գեւորգ Գեւորգյանի հետ եւ ինչու են իրավապահները նրանց միամյանց հետ կապում, անգամ փաստաբանը չի հասկանում:

Գեւորգյանի փաստաբան Հարություն Բաղդասարյանը «Հրապարակ»-ի հետ զրույցում ասաց, որ դեռեւս որոշում չկա՝ մեղադրանք առաջադրելո՞ւ են իր վստահորդին, թե ոչ։ Գեւորգյանին երեկ են ձերբակալել՝ եղբայրների հետ․ «Օբյեկտիվ իրականությունը սա է՝ եթե ինքը հավատացյալ է, գնում է եկեղեցի, եկեղեցի կարող են գնալ բազմաթիվ հավատացյալներ, եւ որպես կանոն եկեղեցում բարձր չես խոսում, տեսնում ես, որ այս մարդը գալիս է եկեղեցի, պարբերաբար գալիս ես եւ տեսնում, որ այդ մարդը եկեղեցում է, այդպես հնարավոր է, որ այդ մարդիկ իրար տեսած լինեն, բայց ընդհանուր բան կազմակերպելն աբսուրդ է, եթե նույնիսկ իրար ճանաչում են կամ իրար գիտեն, դա նշանակո՞ւմ է, որ միասին ինչ-որ բան պետք է կազմակերպեն։ Տեսեք, Գեւորգն ապրում է այդ տարածքում, ինքը մշտապես գնում է այդ եկեղեցի եւ ինքը եկեղեցու ծխական խորհրդի անդամ է, հետեւաբար՝ հաճախակի է այնտեղ լինում ու դա իր ամենօրյա գործունեությունն է։ Չի բացառվում մարդկայնորեն մեկը մեկին տեսած լինեն, բայց տեսած լինելն իրար ու ինչ-որ բան կազմակերպելը ուրիշ բաներ են»։

Ըստ փաստաբանի՝ Գեւորգ Գեւորգյանի նկատմամբ, եթե կասկածանք կա, դա վերջինիս հայացքն է` աչքերի արտահայտությունը․ «Նա էլ ասում է՝ եթե իմ հայացքն է, ապա իմ աչքերը դրեք ձեր «սրտիկի» մեջ, թող իմ հայացքը դառնա ձեր համար լոգո։ Գեւորգն ասում է՝ ուրիշ բան չկա, ընդամենը նայել եմ։ Որեւէ գործողություն չկա»։