«Ակնկալիք չունեմ այս դատարանից»
Tue, 31 Mar 2026 20:43:56 +0400
Դատարանի բակում լրագրողների հետ զրույցում Դավիթ Մինասյանի աջակից Արտյոմ Մոսինյանը անդրադարձել է վերջին զարգացումներին՝ դրանք բնութագրելով որպես հերթական սադրանք Հայ առաքելական եկեղեցու դեմ։
Նրա խոսքով՝ տեղի ունեցածից հետո արձանագրվել են նաև մի շարք ապօրինի գործողություններ։ Մոսինյանը նշել է, որ երկրում օրեցօր ավելանում է քաղաքական բանտարկյալների թիվը՝ մտահոգություն հայտնելով ստեղծված իրավիճակի վերաբերյալ։
Խոսելով դատարանի հնարավոր որոշման մասին՝ նա ընդգծել է, որ որևէ սպասելիք չունի դատական համակարգից։ Նրա համոզմամբ՝ այն գործում է մեկ կենտրոնից՝ իրականացնելով տարբեր, իր գնահատմամբ, ապօրինի քայլեր։ Մոսինյանը պնդել է, որ նման վերաբերմունքը դրսևորվել է թե՛ եկեղեցու ներկայացուցիչների, թե՛ հոգևորականների, ինչպես նաև մի շարք հայրենասեր քաղաքացիների նկատմամբ, և այժմ նույնը տեղի է ունենում նաև Դավիթ Մինասյանի պարագայում։
Հիշեցնենք, որ դատարանում քննարկվում է Սուրբ Աննա եկեղեցում մարտի 29-ին տեղի ունեցած միջադեպի մասնակից Դավիթ Մինասյանի նկատմամբ կալանքի կիրառման հարցը։