Մոսկվայում էլ են դրել հեծանվորդի տեղ․ ի՞նչ մարաթոնի են հրավիրել Փաշինյանին
Wed, 01 Apr 2026 12:55:19 +0400
Պարզվում է՝ «Cyclingrace» հեծանվավազքի կազմակերպիչներն ուրախ կլինեն հրավիրել ՀՀ վարչապետ Նիկոլ Փաշինյանին «Սադովոյե կոլցո» հեծանվավազքին, որը տեղի կունենա Մոսկվայում՝ մայիսի վերջին։
Այս մասին նրանք հայտնել են ՌԻԱ Նովոստիին։
«Ուրախ կլինենք ՀՀ վարչապետին հրավիրել Մոսկվա մայիսի վերջին և մասնակցել մեր գլխավոր միջոցառմանը՝ «Սադովոյե կոլցո» հեծանվավազքին, որը միջազգային կարգավիճակ ունի», – նշել են կազմակերպիչները։
Ընկերությունը նաև հայտնել է, որ ՌԴ մայրաքաղաք հեծանվավազքին մասնակցելու համար կժամանեն հեծանվորդներ նախկին ԽՍՀՄ և այլ երկրներից։ Մրցավազքը երկար և հարուստ պատմություն ունի, այն չի չեղարկվել նույնիսկ Հայրենական մեծ պատերազմի ժամանակ։
Հիշեցնենք, որ 2025 թվականի դեկտեմբերին Մոսկվա կատարած այցի ժամանակ վարչապետը հեծանիվով շրջել էր Մոսկվայի կենտրոնում։
Հավելենք նաև, որ Նիկոլ Փաշինյանն այսօր աշխատանքային այցով կլինի Մոսկվայում, որտեղ կկայանան նրա բանակցությունները ՌԴ նախագահ Վլադիմիր Պուտինի հետ։
Ի դեպ, Փաշինյանը հայտնի է հեծանվավարության նկատմամբ իր նախասիրությամբ, որը նա ներկայացնում է, սակայն, իբրև իր առաջադեմ, ժողովրդավար լինելու լույսի ներքո։ Իրականում՝ կրկնօրինակում է համաշխարհային մյուս առաջնորդներին, որոնք ևս սիրում են հեծանիվ վարել հանրությանն ի տես։
Հիշում ենք՝ Փաշինյանը հաճախ ցուցադրաբար հեծանվով ժամանել է Կառավարություն, հատուկ ֆլեշ-մոբ էր իրականացնում, հեծանվորդների, բայց իրականում՝ համակիրների թիմ հավաքագրում, առավոտ կանուխ հեծանվային վոյաժներ անում, տարբեր երկրներում ևս նստում հեծանիվի ղեկին և այլն և այլն։ Անկեղծ ասած, հեծանիվի ղեկին նա ավելի նախընտրելի է և հմուտ, քան պետության։
Բայց երկու դեպքում էլ՝ նրա արածը պարզ պոպուլիզմ է․ եթե հեծանիվի ղեկին նրա երթևեկն անշառ է ու անվնաս, ապա պետության և իշխանության ղեկին՝ ազգակործան ու աղետաբեր։