Համաձայն դիվանագիտական կամ պետական արարողակարգի մասնագետների, աշխատանքային նախաճաշը (working breakfast) դիվանագիտական կամ պետական արարողակարգային միավոր է, որի ընթացքում միջպետական կամ քաղաքական, կամ տնտեսական հարցերի քննարկումը զուգորդվում է նախաճաշի հետ։ Այն համարվում է գործնական շփման ձեւ, որը թույլ է տալիս եւ պահպանել ոչ ֆորմալ հաղորդակցման մթնոլորտ եւ դիվանագիտական եւ սիմվոլիկ նորմերը։ Աշխատանքային նախաճաշը սովորաբար կիրառվում է պետությունների ղեկավարների մակարդակում՝ պետական, պաշտոնական կամ աշխատանքային այցերի ընթացքում, կամ էլ միջազգային գագաթնաժողովների, կոնֆերանսների կամ հավաքների ժամանակ։

Աշխատանքային նախաճաշը եւս խիստ կարգավորված դիվանագիտական արարողակարգային միավոր է, որտեղ նախապես որոշվում եմ համաձայնեցվում են՝ անցկացման վայրը, մասնակիցների կազմը, մասնակիցների՝ սեղանի շուրջ նստելու տեղերի որոշումը, աշխատանքային նախաճաշի տեւողությունը, ճաշացանկը։ Որպես կանոն, աշխատանքային նախաճաշերին սովորաբար ներկա կարող են լինել՝ բացի պետությունների ղեկավարներից նաեւ՝ վարչապետները, Արտաքին գործերի նախարարները, պատվիրակության առանցքային անդամները, խորհրդականներն ու թարգմանիչները։

Ընդունված պրակտիկա է, որ աշխատանքային նախաճաշերի ժամանակ մասնակիցների թիվը լինի սահմանափակ, որպեսզի քննարվկվելիք հարցերը լինեն ավելի բովանդակային եւ առարկայական։ Սովորաբար աշխատանքային նախաճաշը տեւում է ոչ ավել, քան 1-1,5 ժամ։ Ի դեպ, աշխատանքային նախաճաշերը սովորաբար դիտարկվում են որպես «փափուկ ուժի» կիրառման տարբերակներ, երբ հյուրընկալող կողմը փորձում է հյուրի վրա ազդել ոչ ֆորմալ մթնոլորտ, վստահելի միջավայր, սիմվոլիկ քայլերի միջոցով։ Աշխատանքային նախաճաշի ժամանակ ցանկացած դետալ կարեւոր է, ինչպես առհասարակ կարեւոր է պետական արարողակարգի կամ դիվանագիտության ցանկացած դետալ եւ պարունակում է սիմվոլիկ իմաստ ու ասելիք՝ «մեսիջ»։