Պատերազմը կավարտվեր, եթե դա անեին
Thu, 02 Apr 2026 11:30:10 +0400
Եռաբլուր զինվորական պանթեոնում ունեցած ելույթի ժամանակ Արցախի Հանրապետության Ազգային ժողովի նախկին պատգամավոր, աշխարհազորային Աշոտ Սարգսյանը հանդես է եկել մի շարք հայտարարություններով՝ անդրադառնալով թե՛ 44-օրյա պատերազմի հանգամանքներին, թե՛ այդ ընթացքում կայացված որոշումներին։
Սարգսյանը քննադատել է այն պնդումները, թե «Իսկանդեր» հրթիռային համակարգը կարող էր սահմանափակ արդյունավետությամբ գործել՝ դրանք համարելով անհիմն։ Նա նաև բարձրաձայնել է հարց, թե ինչու պատերազմի ընթացքում հարված չի հասցվել Բաքվի նավթամուղին՝ նշելով, որ նման քայլը, իր գնահատմամբ, կարող էր արագ ավարտել ռազմական գործողությունները։ Նրա համոզմամբ՝ պատերազմի ընթացքում գոյություն են ունեցել որոշակի պայմանավորվածություններ Հայաստանի և Ադրբեջանի իշխանությունների միջև։
Աշոտ Սարգսյանը նաև հերքել է այն տեսակետները, թե 44-օրյա պատերազմը կազմակերպվել է Հայաստանի նախկին նախագահներ Ռոբերտ Քոչարյանի և Սերժ Սարգսյանի կողմից՝ իշխանափոխության հասնելու նպատակով։ Նա այդ պնդումները գնահատել է որպես անհիմն և ընդգծել, որ նման վարկածների ապացույցներ չեն ներկայացվել, թեև Ազգային ժողովում ստեղծված քննիչ հանձնաժողովը լայնածավալ ուսումնասիրություն է իրականացրել։
Խոսելով կոնկրետ դեպքերի մասին՝ Սարգսյանը նշել է, որ հարցաքննվել են բազմաթիվ անձինք, և ըստ նրանց ցուցմունքների՝ պարզ է դարձել, թե ովքեր են հրամաններ տվել դիրքերը լքելու վերաբերյալ։ Նա ներկայացրել է նաև աշխարհազորայինների օրինակ՝ նշելով, որ իրենց վստահված է եղել մի քանի կիլոմետր երկարությամբ հատվածի պաշտպանությունը, սակայն նոյեմբերի սկզբին ստացել են դիրքերը լքելու հանձնարարական։ Նրա խոսքով՝ այդ որոշմանը չեն ենթարկվել՝ հաշվի առնելով հնարավոր հետևանքները և հակառակորդի առաջխաղացման վտանգը։