Երթը կազմակերպում էին երիտասարդաց միությունները, որոնց լուծարել են
Sat, 04 Apr 2026 12:22:47 +0400
Արարատյան Հայրապետական թեմի տեղեկատվական բաժինը հայտարարություն է տարածել․
«Հրավիրում ենք «Հարության Ավետիս» կանթեղներով ավանդական երթին
Ապրիլի 4-ին` ժամը 19։30-ին, Արարատյան Հայրապետական թեմի առաջնորդանիստ Ս. Սարգիս եկեղեցուց կմեկնարկի ավանդական դարձած կանթեղներով երթը՝ «Հարության Ավետիս» խորագրով:
Երթն իրականացվում է թեմի առաջնորդական փոխանորդ Գերաշնորհ Տ. Նավասարդ արքեպիսկոպոս Կճոյանի օրհնությամբ:
«Հարության Ավետիս» քայլերթին կարող են միանալ բոլոր ցանկացողները:
Սիրով սպասո՛ւմ ենք ձեզ»։
Ավանդական դարձած կանթեղներով երթը տարիներ շարունակ կազմակերպում էին ու դրան մասնակցում Արարատյան Հայրապետական թեմի երիտասարդաց միությունները, որոնք ամիսներ առաջ լուծարվեցին։ Հիշեցնենք, որ հենց երիտասարդաց միության մի շարք երիտասարդների մասնակցությամբ էր միջադեպ եղել 2025֊ի դեկտեմբերին առաջնորդանիստ սուրբ Սարգիս եկեղեցում, մասնավորապես՝ վարչապետ Փաշինյանի՝ եկեղեցի այցով պայմանավորված՝ պատարագ մատուցող քահանան զեղչել էր վեհափառի անունը, ինչին ընդդիմացել էին պատարագի մասնակից երիտասարդներն ու ծրագրերի համակարգող, «Արարատ» միության ատենապետ Անուշ Վարդանյանը, որոնք պատարագի համապատասխան հատվածում նկատելով վեհափառի զեղչվող անունը, հնչեցրել էին այն, միջադեպը տարածվել ու լայն արձագանք էր գտել սոցցանցերում։