Կարևորվել է Հայաստանի հետ հարաբերությունների կարգավորումը․ Ալիևը Վրաստանում է
Mon, 06 Apr 2026 14:23:51 +0400
Ապրիլի 6-ին Թբիլիսիում կայացել է Ադրբեջանի նախագահ Իլհամ Ալիևի և Վրաստանի նախագահ Միխեիլ Կավելաշվիլիի դեմ առ դեմ հանդիպումը։
Ադրբեջանական ԶԼՄ-ների փոխանցմամբ, առանձնազրույցի ընթացքում նշվել է, որ ադրբեջանա-վրացական երկկողմ հարաբերությունները հիմնված են բարեկամության, բարիդրացիության և ռազմավարական գործընկերության սկզբունքների վրա։ Ընդգծվել է, որ համագործակցությունը հաջողությամբ զարգանում է տարբեր ոլորտներում, այդ թվում՝ քաղաքական, տնտեսական, էներգետիկ, կանաչ էներգիայի, տրանսպորտի, ներդրումների և այլն։ Նշվել է տարբեր մակարդակներում փոխադարձ այցելությունների դերը հարաբերությունների ընդլայնման գործում։
Շեշտվել է Ադրբեջանի և Վրաստանի կողմից համատեղ իրականացվող տրանսպորտային և էներգետիկ նախագծերի կարևորությունը՝ նշելով դրանց ռազմավարական և տնտեսական նշանակությունը։
Հանդիպման ընթացքում նաև ընդգծվել է Ադրբեջանի և Հայաստանի միջև հարաբերությունների կարգավորման գործընթացի դերը Հարավային Կովկասում կայունության և անվտանգության ապահովման գործում։
Ադրբեջանի և Վրաստանի նախագահները գոհունակություն են հայտնել միջազգային կազմակերպություններում երկու երկրների համագործակցության կապակցությամբ և մտքեր են փոխանակել կապերի հեռանկարների և փոխադարձ հետաքրքրություն ներկայացնող այլ հարցերի շուրջ։