2024-ին «Հրապարակ»-ը գրել էր, որն ԿԳՄՍՆ-ն դպրոցներին հրահանգել է՝ հեռացնել փառքի անկյունները, հուշատախտակները, որտեղ ազատամարտիկների, ազգային հերոսների, զոհված զինծառայողների նկարներն են փակցված, դրանից հետո լրատվականները բազմաթիվ ահազանգեր եւ փաստեր են հրապարակել այն մասին, որ այս կամ այն տարածքից հեռացրել են փառքի անկյունները, ազգային հերոսների լուսանկարները։

Օրինակ, նույն 2024-ին Արարատ քաղաքի կենտրոնում գտնվող պուրակից հեռացվել էին ազգային հերոսների նկարները, դրանք մինչ օրս չեն վերականգնվել, կամ որ վերջին ամենաթարմ դեպքը՝ Սարդարապատի դպրոցի տնօրեն Կարինե Սմբատյանին աշխատանքից հեռացվել էր մարզպետ Վահրամ Խաչատրյանի հրահանգը չլսելու եւ Արցախի դրոշը դպրոցից չհեռացնելու համար։

«Պարոն մարզպետ, դուք կարող եք հեռացնել ինձ պաշտոնից, բայց չեք կարող հեռացնել հայրենասիրությունն իմ սրտից», – հրաժեշտի հրապարակման մեջ գրել էր Կարինե Սմբատյանը։

«Հրապարակ»-ի տեղեկություններով՝ Արարատի համայնքապետարանը այս անգամ էլ որոշել է Վազգեն Սարգսյանի հայրենի՝ Արարատ գյուղի Մշակույթի տան (գյուղի կենտրոն) մոտ գտնվող 20-րդ դարի սկզբի հեղափոխական շարժման կարևոր դեմքերից մեկի՝ Ստեփան Շահումյանի արձանը հեռացնել, դրա համար առաջիկայում կազմակերպել է հանրային լսումներ։

Հիշեցնենք, որ Ստեփան Շահումյանի անունով է անվանակոչվել Արցախի մայրաքաղաք Ստեփանակերտը եւ Լոռու մարզի Ստեփանավան քաղաքը, եւ հենց Արցախի կենտրոնում նախկինում Ստեփան Շահումյանի արձանն է եղել եւ հրապարակը ի պատիվ նրա կոչվել է Շահումյանի հրապարակ։

Արարատի վարչական ղեկավար Էլեն Գասպարյանը «Հրապարակ»-ի հետ զրույցում ասաց, որ Ստեփան Շահումյանի արձանը ցանկանում են տեղափոխել այգի՝ տեղում կտեղադրվի Վազգեն Սարգսյանի արձանը․ «Ժողովուրդն է այդպես ցանկացել»։

Ստորագրահավա՞ք է եղել, վարչական ղեկավարն ասաց՝ ոչ, քննարկում է եղել։