Ոչ մի արժանիք
Sat, 11 Apr 2026 09:00:16 +0400
Ի՞նչ չափանիշների պետք է համապատասխանի երկրի ղեկավարը:
Գրագետ՝ տնտեսությունից եւ արտաքին քաղաքականությունից գլուխ հանող, խելացի՝ իրենից խելացի մարդկանց կարծիքը լսող, ժուժկալ՝ փողի նկատմամբ թուլություն չունեցող, քաղաքավարի՝ թե՛ ենթակաների, թե՛ արտաքին գործընկերների հետ հարգալից շփվող, զուսպ՝ սեփական խոսքի արժեքը բարձր գնահատող, ժողովրդավար՝ ինստիտուտների նկատմամբ հարգանք ունեցող, արդարամիտ՝ հակառակորդների դեմ ազնիվ պայքարող, հոգատար՝ սոցիալապես անապահով խավերի նկատմամբ կարեկցանք ունեցող, հայրենասեր՝ ազգային արժեքները կարեւորող, պետականամետ՝ պետության շահը սեփականից վեր դասող։
Այս չափանիշներից քանիսի՞ն է համապատասխանում գործող վարչապետը: «Մի քիչ իրեն գժի տեղ դնելով» շփվել է արտաքին գործընկերների հետ։ Եվրոպական շուկան չմտած՝ նեղացնում է ԵԱՏՄ գործընկերներին։ Կառավարությունում չկա մի մարդ, որն իր պաշտոնին հարիր կրթություն կամ փորձ ունենա։ Սեփական թիմին եւ իրեն աստղաբաշխական պարգեւավճարներ է բաժանում։ Ենթականերին նվաստացնում է «վոթսափյան» քաղաքականությամբ, այլ պետությունների ղեկավարներին շշպռում իր «ազատ սոցիալական ցանցերով»։
Դատարանները շրջափակելու կոչերով եւ սահմանադրություն փոխելով՝ ոչնչացրել է իրավապահ համակարգը։ Ընդդիմախոսներին ամիսներով կալանքի տակ է պահում եւ հեգնում, թե «ինտերնետ ունեք, մի բան ասեք»։ Աղքատներին ասում է՝ աղքատությունը ձեր գլխում է, թոշակառուի՝ 10 հազար դրամ ծախսելու ունակության վրա է կասկածում։ Պատմական արդարությունը՝ անիմաստ համարում, իսկ պետության շահը 600 դոլարանոց գազի եւ առեւտրի բացակայության մեջ է տեսնում։