1600 տարվա քրիստոնեական սրբավայր է հայտնաբերվել
Mon, 13 Apr 2026 18:15:26 +0400
Եգիպտոսում ավելի քան 1600 տարվա հնության քրիստոնեական վանքի ավերակներ են հայտնաբերվել։ Վանքը եղել է անապատում։ Այս մասին հայտնում են տեղի իշխանությունները։ Սա համարվում է եզակի հնագիտական բացահայտում, քանի որ կարեւոր լույս կարող է սփռել վաղ քրիստոնեական ժամանակների, հատկապես վանական կյանքի ձեւավորման եւ եգիպտական վանական-անապատականների շարժման պատմության վրա։ Վանքի ավերակները գտնվում են Բուխեյրայի նահանգում, Վադի ալ-Նաթրունում։ Այս շրջանը համարվում է համաքրիստոնեական մակարդակով վանական-անապատական շարժման առաջացման կենտրոններից մեկը։ Վանքի ավերակները թվագրվում են ՄԹ 4-6-րդ դդ։ Շինությունը կառուցված է կավից թրծված աղյուսից, ընդգրկում է մոտ 2 հազար քառակուսի մետ։
Պատերի հաստությունը երեք ոտնաչափ է, բարձրությունը՝ յոթ ոտնաչափ։ Վանքի ավերակների տարածքում կա բաց ներքին բակ, շրջապատված շինություններով։ Այդ շինություններում եղել են վանականների խցերը, վառարաններ, խոհանոց եւ սեղանատուն, պահեստարաններ։ Հնագետները նաեւ հայտնաբերել են մարդկային կմախքների մնացորդներ, որոնք ենթադրվում է որ եղել են այդ վանքում երբեւէ ապրած վանականներինը։ Շինությունների պատերին կան նկարազարդումներ, ճարտարապետական էլեմենտներ։ Վանական համալիրի շինություններն ունեցել են կամարներ եւ գմբեթներ։ Պատերը ծածկված են եղել սպիտակ սվաղով, ունեն որմնանկարներ, որոնք պատկերել են խաչեր, արմավենու ծառեր, ինչպես նաեւ տարբեր երկրաչափական պատկերներ, բուսական նկարազարդումներ։
Պեղումների ժամանակ հայտնաբերվել են նաեւ գրություններ, որոնք պարունակել են վանականների անունները, ովքեր բնակվել են այդ վանքում, ինչպես նաեւ ներման ու ողորմածության աղոթքներ։ Մասնագետները նշում են, որ գտածոները օգնում են թվագրել վանական համալիրը եւ վավերագրել առօրյա վանական կյանքը։