Սրտիկներին չխաբվեք
Wed, 15 Apr 2026 09:00:01 +0400
Սրանց յուրաքանչյուր արարքին պետք է նայել հունիսի 7-ի պրիզմայով: Դա կօգնի հասկանալ այս իշխանությունների պահվածքի եւ արարքների շարժառիթները: Եթե կարճ ձեւակերպենք, ապա երկու գործոն է այժմ դեր խաղում` ումից են իրենք ամենից շատ վախենում եւ ինչպես են փորձում վախի մթնոլորտ ձեւավորել երկրում:
Դատելով քրեական մեթոդներ կիրառելու գործիքակազմից, սրանք ամենից շատ վախենում են Սամվել Կարապետյանի ուժից: Այնքան են վախենում, որ 40 օրական երեխա ունեցող կնոջն են անգամ ձերբակալում` նրան մեղադրելով բարեգործության մասին օրենքը խախտելու համար: Որպեսզի հասկանաք` այդ ձերբակալության աբսուրդայնությունը, ընդամենը նշեմ, որ ձերբակալության եւ կալանքի մեթոդը կիրառելու անհրաժեշտություն բացարձակապես չկար: Առհասարակ` աշխարհում նույնիսկ մարդասպաններին չեն ձերբակալում, մինչեւ դատարանի կողմից դատավճռի արձակումը, իսկ մեզանում ինչ-որ մեկի հետ մի անմեղ զրույցի համար կարող են կրծքի երեխա ունեցողին բանտ տանել:
Նիկոլական Հայաստանում կալանքը պատժամիջոց է, կիրառվում է բոլոր այլախոհների ու իրենց չենթարկվողների նկատմամբ: Դա Նիկոլ Փաշինյանի ամենասիրելի «գործիքն» է: Այս գործիքի կիրառումից նրան եւ իր իրավապահներին ոչինչ հետ չի պահում` տարեց մարդ կլինի իրենց առաջ, թե նոր-նոր չափահաս դարձած անձ, հիվանդ կլինի, թե կերակրող մայր, հարգված գիտնական, թե հայրենիքի համար կյանքը դրած զինվորական` սրանց համար ոչ մի նշանակություն չունի: Ազգի կեսին կալանավորել են, մյուս կեսին պատրաստվում են կալանավորել, եթե, իհարկե, ՔՊ անդամ չէ կամ ՔՊ համակիր: Բայց աբսուրդը տասնապատկվում է նրանով, որ այդ բոլորն անում են զօրուգիշեր սիրուց ու համերաշխությունից, ատելության դեմ պայքարից խոսելով, սրտիկներ ցույց տալով, երգուպարով: