«Հրապարակ»․ «Ուժեղ Հայաստան» դրամաշնորհային ծրագիր
Fri, 17 Apr 2026 10:25:11 +0400
Նիկոլ Փաշինյանի իշխանությանն անհանգստացնում է Սամվել Կարապետյանի եւ նրա ուժի անունը։ Հապճեպ օրենսդրական փոփոխությամբ բացառեցին Սամվել Կարապետյանի անունն օգտագործելու փաստը։ Հիմա էլ «Ուժեղ Հայաստան» անունով դրամաշնորհային ծրագիր են իրականացնում, երեւի նպատակ ունենալով նսեմացնել «ուժեղ Հայաստանի» գաղափարը, այն իջեցնելով դրամաշնորհային ծրագրի մակարդակի։ Պաշտոնապես հայտարարվել է «Զարգացող համայնքներ-ուժեղ Հայաստան» դրամաշնորհային ծրագրի մեկնարկը։ Հայտարարվել է, որ այն ուղղված է երկրի համաչափ եւ կայուն առաջընթացի ապահովմանը։ Ծրագրի ռազմավարական ուղղություններն են․ գյուղատնտեսության արդիականացում՝ նորարարական տեխնոլոգիաների ներդրման միջոցով, էկոլոգիական կայունություն եւ բնապահպանական նախաձեռնությունների խթանում, գյուղական տուրիզմի զարգացում։
Ծրագրով տրամադրվող դրամաշնորհի առավելագույն չափը մինչեւ 40 միլիոն դրամ է, ծրագիրն իրականացվում է 3 փուլով՝ գաղափարի նախնական գնահատում, դասընթաց եւ բիզնես նախագծի ներկայացում։ Ծրագիրը չունի մեկ վերջնաժամկետ՝ հայտերը դիտարկվում են փուլ առ փուլ, ամբողջ ծրագրի գործողության ընթացքում՝ մինչեւ 2030 թ.։