Կջերմանա՞ն Մոսկվա-Բաքու հարաբերությունները
Tue, 21 Apr 2026 13:45:05 +0400
Ապրիլի 15-ին Ռուսաստանի եւ Ադրբեջանի ԱԳ նախարարությունները հանդես եկան համատեղ հայտարարությամբ, որը վերաբերում էր AZAL-ի օդանավի կործանման դեպքին։ Մոսկվան ու Բաքուն արձանագրեցին, որ զոհվածների ընտանիքներին կվճարվի փոխհատուցում։ Կոնկրետ գումարներ չեն նշվում։ Սակայն, ինչպես գրում է Սերգեյ Մարկեդոնովը, այդ հայտարարությունում այլ բան է կարեւոր․ Մոսկվան ու Բաքուն կարողացան փոխզիջման հանգել վիճելի հարցի շուրջ։ Կարելի է ենթադրել, որ առաջիկայում ռուս-ադրբեջանական հարաբերություններում դրական տեղաշարժեր կլինեն, ինչը նկատելի է նաեւ հայտարարության որոշ ձեւակերպումներից։
Մարկեդոնովը, ներկայացնելով այդ «գործի» ողջ պատմությունը, հռետորական հարց է տալիս` հիմա, երբ «գործը», կարելի է ասել, փակված է, արդյո՞ք Մոսկվա-Բաքու հարաբերությունները կսկսեն ջերմանալ։ «Կուզենայինք այդ հարցին միանշանակ եւ դրական պատասխանել։ Սակայն կան բավականին շատ նյուանսներ»,- գրում է նա։
Ադրբեջանական օդանավի խոցման դեպքը՝ իր ողջ կարեւորությամբ հանդերձ, միակ խնդիրը չէ, որի պատճառով հարաբերությունները Մոսկվայի եւ Բաքվի միջեւ «սառեցվել էին»։ Կենտրոնական Ասիայի, Հարավային Կովկասի, Մերձավոր Արեւելքի եւ, առհասարակ, եվրասիական իրադրությունը ներկայում զարգանում է չափազանց արագ։ Այդ ռեգիոնների երկրների դերերն արագ փոխվում են։ Որոշների հնարավորություններն աճում են, որոշներինը՝ նվազում։ Եվ հայացքների ու մոտեցումների տարբերություններից ու տարաձայնություններից որեւէ մեկն ապահովագրված չէ։ Սակայն կարեւոր է մի բան․ քաղաքական կամքի առկայությունը՝ ցանկացած, նույնիսկ ամենասուր քաղաքական ճգնաժամը հաղթահարելու՝ եզրակացնում է Մարկեդոնովը։