«Տիկին պետքարտուղարը»․ սերիալ, որն արժե դիտել
Thu, 23 Apr 2026 01:00:58 +0400
Ամերիկյան «Տիկին պետքարտուղարը» դրամատիկ քաղաքական սերիալը, որի ռեժիսորն է Բարբարա Հոլը, ցուցադրվել է 2014-19 թվականներին։ Այն ժամանակակից հեռուստատեսային քաղաքական սերիալային նախագծերի շարքում կարեւոր ձեռքբերում է համարվում եւ համադրում է քաղաքական դրաման, ընտանեկան սերիալը, գաղափարական դիսկուրսը, որի հիմնական ասելիքը քաղաքականության մեջ եւ իշխանության վերին էշելոններում կնոջ դերակատարումն է։ Գլխավոր հերոսն Էլիզաբեթ Մաքորդն է՝ ԱՄՆ Կենտրոնական հետախուզական վարչության նախկին վերլուծաբան, քաղաքագիտության պրոֆեսոր, որ նշանակվում է ԱՄՆ պետքարտուղարի պաշտոնում, եւ որի կերպարը կերտել է Թեա Լեոնին։
Սերիալի սյուժեի առանցքում միջազգային ճգնաժամերի կարգավորումն ու դիվանագիտական բանակցություններն են, որոնք անցկացնում է Միացյալ Նահանգները։ Սերիալում փորձ է արվում դրամատիզմն ու իրապաշտությունը համադրել։ Մի կողմից՝ ցույց է տրվում, թե ինչպես են որոշումները կայացվում ամենաբարձր մակարդակներում, մյուս կողմից՝ կա որոշակի իդելականացում, ինչը, ըստ քննադատների, սերիալը դարձնում է ավելի ուտոպիստական, ցույց տալով ոչ թե ռեալ իրականությունը, այլ այն, թե ինչպիսին պետք է լինի ցանկալի իրականությունը։ Կան մասնագետներ, ովքեր կարծում են, որ «Տիկին պետքարտուղարը» սերիալում գլխավոր հերոսուհի Էլիզաբեթ Մաքորդը փորձում է բալանսավորել ընտանեկան կյանքն ու պրոֆեսիոնալ գործունեությունը։ Կա կարծիք, որ սերիալում արտահայտված է «կինը կարող է ունենալ ամեն բան» պոստֆեմինիստական գաղափարը։
Սերիալը կարող են դիտել հատկապես նրանք, ովքեր սիրում են քաղաքական դրամաներ, հետաքրքրված են քաղաքականությամբ, էլիտաների ներսում եղած հարաբերություններով, վերին էշելոններում որոշումների կայացման մեխանիզմներով ու ընտանեկան-մարդկային հարաբերություններով։