Գյուղատնտեսության ոլորտը շահութահարկո՞վ կհարկվի
Tue, 28 Apr 2026 15:30:39 +0400
«Ապրելու երկիր» կուսակցության համահիմնադիր Մեսրոպ Առաքելյանը նշել է, որ Հարկային օրենսգրքի փոփոխությունների համաձայն՝ 2027 թվականի հունվարի 1-ից գյուղատնտեսության ոլորտը պետք է անցնի շահութահարկով հարկման համակարգին։ Ներկայումս այս ոլորտը գործում է հարկային արտոնությունների ներքո։
Նրա խոսքով՝ այս փոփոխությունը կարող է լուրջ խնդիրներ ստեղծել գյուղատնտեսության համար, հատկապես՝ փոքր և միջին տնտեսավարողների շրջանում, որոնք ավելի խոցելի են նման ֆինանսական ծանրաբեռնվածության դեպքում։
Առաքելյանը նաև ընդգծում է, որ հարկային բեռի ավելացումը կբերի արտադրության ինքնարժեքի բարձրացման, ինչը կարտացոլվի գյուղմթերքի գների վրա։ Դա, ըստ նրա, կարող է նվազեցնել բնակչության գնողունակությունը և բացասաբար ազդել ընդհանուր սոցիալ-տնտեսական վիճակի վրա։
Այս համատեքստում նա առաջարկում է փոփոխություն կատարել Հարկային օրենսգրքում՝ գյուղատնտեսության ոլորտի շահութահարկի կիրառումը առնվազն 10 տարով հետաձգելու նպատակով, որպեսզի ոլորտը կարողանա զարգանալ առանց լրացուցիչ ռիսկերի և հնարավոր սոցիալական խնդիրների։