Կարմիրներ եւ կապույտներ
Thu, 30 Apr 2026 18:45:08 +0400
Շատերին թվում է, թե ՀՀ քաղաքացու նոր անձնագիր հնարելու պատճառն այս իշխանությունների՝ Արարատ լեռան սիմվոլիկայից հրաժարվելն է: Մինչդեռ Արարատ լեռան պատկերները մեր անձնագրերից հեռացնելն ընդամենը շարժառիթ է, որը ՀՀ իշխանություններին (ոչ վերարտադրվեն) թույլ կտա հետագայում ՀՀ քաղաքացիներին եւս մեկ անգամ պառակտել, այս անգամ՝ «կարմիրպասպորտավորների» եւ «կապույտպասպորտավորների»: Նրանք, որոնք կհամաձայնեն առանց Արարատի պատկեր կարմիր անձնագիր ունենալ, շատ արագ կփոխեն անձնագրերը, իսկ ես, որ չեմ ուզենա բաժանվել Արարատից, կմնամ իմ կապույտ անձնագրով: Եվ հենց այդ ժամանակ էլ Նիկոլը կգա (ոչ գա) ու անսխալ կորոշի, թե ով է իր «իրական» կողմնակիցը եւ ով՝ իրական հակառակորդը:
Պարզունակ բան եմ ասում, այնպես չէ՞: Բայց այս իշխանությունների ո՞ր քայլը պարզունակ չէ: Սրանք երբեւէ երկու քայլանոց կոմբինացիա իրականացրած կա՞ն: Է՜ն ամենասկզբում ասացին՝ մենք սպիտակ ենք, իսկ դուք՝ սեւ: Երբ տեսան, որ գեղեցիկ բան չստացվեց, սկսեցին մետրոյում նոր՝ Նիկոլի «անձնագրեր» բաժանել: Դարձյալ խայտառակվեցին:
Մի աղջիկ պատռեց այդ ինքնագործ «անձնագիրն» ու շպրտեց Նիկոլի երեսին: Նիկոլի ծրագրած հիմար հանրաքվեն դրանով տապալվեց: Թե բա՝ կորոնան մեզ խանգարեց: Չէ-հա… Անցան տարիներ, պատերազմ եղավ, պարտություն, կապիտուլյացիա: 21 թվին էս Նիկոլը, որ մազից էր կախված, վերարտադրվեց, այսինքն՝ ժամանակավորապես փրկվեց պատերազմի, զոհերի եւ կապիտուլյացիայի համար պատասխանատվությունից: Ու միացրին «ժողովուրդն է մեզ ընտրել» ձայնապնակը: Երգեցին, երգեցին, բայց մի գեղեցիկ օր ենթարկվեցին նոր կապիտուլյացիայի եւ Արցախը հայտարարեցին Ադրբեջանի մաս: Դրանից հետո Արցախը հայաթափվեց: Բա ինչ անե՞նք… Նիկոլն ու իր պարզունակ թիմը, խուճապի մեջ, սկսեցին մեղավորների շքերթ ձեւավորել՝ ռուսներն են մեղավոր, ՀԱՊԿ-ն է մեղավոր, ՆԱՏՕ-ն է մեղավոր, ԵԱՏՄ-ն է մեղավոր, անգամ ԵՄ-ն է մեղավոր, որ իրենց չի ընդունում ԵՄ կազմ: Ի վերջո, իրենց ձախողումներին մի հիմար բացատրություն տվեցին, թե բա՝ Արցախը հանձնեցինք, որ Հայաստանը պահենք: Բերեց, հանրությանը մի «սլյուդայի» կտոր ցույց տվեց, թե՝ ծանոթացեք, սա է «իրական» Հայաստանի Հանրապետությունը: Ոչ ոք, բացի իր պարզունակ ենթականերից, առանձնապես չոգեւորվեց այդ «քարտեզից»: Եվ կրկին ՔՊ-ում օրակարգ մտավ յուրայիններին «օտարներից» զատելու հարցը: Պետք էր մի այնպիսի բան մտածել, որ հնարավոր լիներ նիկոլականներին զատել ոչ նիկոլականներից: Եվ հնարը գտան: Հայաստանի բրոշկա-քարտեզը… Ով դրանից խփեց դոշին՝ նիկոլական է, ով հրաժարվեց ու շպրտեց՝ հականիկոլական: Այսպես սկսվեց հանրությանը «քարտեզակիրների» եւ «անքարտեզների» բաժանելու գործընթացը: Դարձյալ մեկ քայլանոց պարզունակ օպերացիա, եթե նկատեցիք:
Հայաստանում խառը օրեր են: Պատրաստվում ենք ընտրությունների, իսկ Նիկոլն իր պարզունակ թիմով, ինչպես միշտ, պատրաստվում է վերարտադրվել: Հարց է առաջանում՝ ընտրություններից հաշված օրեր պակաս ինչի՞դ էր պետք անձնագրերի հետ կապված այս օյինբազությունը: Ադրբեջանի աջակցությունը քիչ էր, մի հատ էլ Թուրքիայի՞ աջակցությունն ես ուզում ունենալ: Տեսեք-տեսեք՝ Արարատն այնպես ենք հանել ՀՀ քաղաքացու անձնագրից, որ Խոր Վիրապից անգամ չի երեւում: Լավ, բայց թուրքերն էլ հո քեզ նման միագիծ չե՞ն մտածում, չգիտե՞ն, որ Արարատը միլիոնավոր հայերի պատշգամբներից է երեւում, ու հնարավոր չէ Արարատի պատկերը թաքցնել: Կարծում ես՝ թուրքերը սահմանը կբացե՞ն՝ տեսնելով քո կարմիր անձնագրերը: Տես՝ չհիասթափվես:
Արի, քեզ ասեմ, որ ՀՀ քաղաքացիներին հերթական անգամ պառակտելու քայլ դարձավ արածդ: Ուղղակի պառակտեցիր մեր հանրությանը, բայց այս անգամ, բարեբախտաբար, ոչ երկար ժամանակով: Մինչեւ ընտրություններ հանրությունը կարմիր անձնագրի երես չի տեսնի, իսկ ընտրություններից հետո՝ առավել եւս: Իսկ եթե ՔՊ-ականներով, այնուամենայնիվ, հասցնեք կարմիր անձնագրեր ստանալ, դա արդեն մեծ հաջողություն կլինի ձեզ համար: Դուք արդեն անզեն աչքով էլ կտարբերվեք ՀՀ մնացած քաղաքացիներից: