​Գյումրին պատրաստվում է ընդունել Ֆրանսիայի նախագահ Էմանուել Մակրոնին, սակայն քաղաքում տիրող իրավիճակն ու հանրային տրամադրությունները հուշում են, որ սա սոսկ պետական այց չէ։ Կառավարության որոշմամբ՝ միայն մայիսի 5-ին Վարդանանց հրապարակում կայանալիք համերգի համար պետբյուջեից կհատկացվի աստղաբաշխական գումար՝ շուրջ 393 միլիոն դրամ։

​Մինչ պաշտոնական Երևանը քննարկում է մեկ երեկոյի համար հատկացված մեկ միլիոն դոլարից ավելի գումարի «մշակութային նշանակությունը», գյումրեցիները սեփական մաշկի վրա են զգում այցի «դրական» կողմերը։ Արդեն մի քանի օր է՝ քաղաքի կենտրոնական փողոցներում մեկնարկել են աննախադեպ ծավալի բարեկարգման և ասֆալտապատման աշխատանքներ։ Տարիներով անուշադրության մատնված փոսերը հանկարծակի լցվում են։
Գյումրեցիները նկատում են այդ ամենի ձևական կողմը։

«Էդ բեմերը դոմիկների մոտ դրեք ու Մակրոնին էնտեղ դիմավորեք»,— ասում է անցորդներից մեկը՝ հիշեցնելով քաղաքի դեռևս չլուծված սոցիալական վերքերի մասին։

Շատերի համար ակնհայտ է, որ այս շռայլությունն ու հապշտապ ասֆալտապատումը ոչ թե քաղաքի մասին հոգածություն են, այլ քաղաքական «ֆոկուսներ»։

​Մարդիկ վստահ են, որ իշխանությունները փորձում են Մակրոնին տանել Գյումրի, որպեսզի աշխարհին ցույց տան, թե իբր գյումրեցիները, մեր ու մանուկով ուրախացած, դիմավորում են իրենց։

393 միլիոն դրամը Գյումրիի պես քաղաքի համար հսկայական ռեսուրս է, որը կարող էր ուղղվել համայնքային տասնյակ այլ խնդիրների լուծմանը։ Սակայն իշխանությունը նախընտրում է մեկօրյա շոուն։

Քաղաքում շատերն են վստահ`Ֆրանսիայի նախագահի այցը իշխանությունների համար ընդամենը առիթ է՝ փորձելու ցույց տալ, թե իբր Գյումրին իրենց կողքին է։ «Մակրոնին բերում են, որ դուրս գանք հրապարակ, ծափ տանք, իրենք էլ նկարեն, թե բա տեսեք՝ ժողովուրդը մեզ ոնց է ընդունում։ Բայց էս շոուն իրենց չի փրկելու, գյումրեցին ամեն ինչ էլ տեսնում է ու հասկանում»,–խոսքը եզրափակեց մեր մյուս զրուցակիցը։

Վստահաբար հավելենք, որ Վարդանանց հրապարակի մեկօրյա շքեղությունը չի ստիպի մոռանալ քաղաքի իրական խնդիրները, և Մակրոնի հեռանալուն պես քաղաքում կմնա միայն շտապողականությամբ փռված ասֆալտի նոր շերտն ու հերթական հիասթափությունը։