Մեզ ձգում էին դեպի անդունդ
Tue, 05 May 2026 13:41:38 +0400
«Երևանյան երկխոսություն» համաժողովում ունեցած ելույթի ընթացքում ՀՀ արտաքին գործերի նախարար Արարատ Միրզոյանը խոսել է Հայաստանի անվտանգության ընկալումների փոփոխության և պետական ռազմավարական վերաիմաստավորման մասին։
Նրա խոսքով՝ երկար տարիներ Հայաստանում գերակշռել է այն համոզմունքը, թե մեկուսացված դիրքորոշումը կարող է ապահովել անվտանգություն և պահպանել արդեն ձևավորված հարմարավետ իրավիճակը։ Սակայն, ըստ նախարարի, ժամանակի ընթացքում այդ պատկերացումը չի արդարացել։
Միրզոյանը նշել է, որ երբ տարածաշրջանային և գլոբալ ճգնաժամերը խորացել են, նախկինում ձևավորված անվտանգության զգացումը փլուզվել է, և երկիրը հայտնվել է բարդ ու անկայուն գործընթացների կենտրոնում։ Նրա բնորոշմամբ՝ այդ փուլում Հայաստանը կանգնել է իրավիճակի առաջ, որտեղ արտաքին զարգացումները շարունակաբար ազդել են երկրի վրա՝ սահմանափակելով ինքնուրույն որոշումների հնարավորությունը։
Նախարարը ընդգծել է, որ հենց այդ պայմաններում ձևավորվել է նոր մոտեցում՝ հրաժարվել պարտադրված ուղիներից և անցյալից եկող մտածողությունից ու գնալ ինքնուրույն որոշումների ճանապարհով։ Նրա խոսքով՝ դա ենթադրում է պետության կողմից պատասխանատվության ստանձնում սեփական զարգացման և ապագայի համար։
«Երբ եկավ ճգնաժամը և այդ երևակայական անվտանգությունը փլուզվեց, մենք հայտնվեցինք մի հորձանուտում, որտեղ չնայած մեր համառ ջանքերին, մեզ ձգում էին դեպի անդունդ և այդ ժամ, ինչ որ պահի մենք որոշեցինք դուրս գալ այդ արատավոր շրջապտույտից, չհետևել այն ուղուն, որ ուրիշներն էին կանխորոշել մեզ համար, այլ ստանձնել պատասխանատվություն մեր սեփական ճակատագրի վերաբերյալ ինքնիշխան որոշումներ կայացնելու համար»,- նշել է նա: