Որդիների մասին պետք է խոսեն այն մարդիկ, ովքեր գիտեն՝ ուր են եղել իրենց որդիները
Thu, 07 May 2026 12:33:12 +0400
Ազգային ժողովում շարունակվող գլխավոր դատախազության տարեկան հաշվետվության քննարկումները կրկին վերածվել են իշխանություն-ընդդիմություն սուր բանավեճի։ Քննարկումների ընթացքում «Հայաստան» խմբակցության ղեկավար, պաշտպանության նախկին նախարար Սեյրան Օհանյանը պատասխանել է իր և որդու հասցեին հնչեցված մեղադրանքներին։
Օհանյանը հայտարարել է, որ մարտական գործողությունների ընթացքում վիրավորում ստացած անձանց դերը չի կարելի նսեմացնել կամ ներկայացնել որպես պատահական հանգամանք։ Նրա խոսքով՝ զինվորականների և նրանց ընտանիքների վերաբերյալ գնահատականներ պետք է հնչեցնեն այն մարդիկ, ովքեր պատրաստ են պատասխանել նաև իրենց հարազատների մասնակցության և գործունեության մասին հարցերին։
Քննարկումների ընթացքում իշխանական պատգամավորներ Վահագն Ալեքսանյանը և Անդրանիկ Քոչարյանը մեղադրանքներ էին ներկայացրել Օհանյանի որդու հասցեին՝ նշելով, որ պատերազմի ընթացքում հարավային ուղղության պատասխանատվությունը եղել է նրա և ԳՇ պետի նախկին տեղակալ Տիրան Խաչատրյանի վերահսկողության ներքո։
Ի պատասխան՝ Օհանյանը կոչ է արել իշխանություններին մշտապես Մարտի 1-ի իրադարձություններին անդրադառնալու փոխարեն քննարկել ընդդիմության առաջարկը՝ 2020 թվականի Արցախյան պատերազմի հանգամանքներն ուսումնասիրող անկախ հանձնաժողով ստեղծելու վերաբերյալ։ Նրա խոսքով՝ առաջարկվում էր ձևավորել հավասար ներկայացվածությամբ հանձնաժողով, որը հնարավորություն կտար հանրությանը ստանալ պատերազմին վերաբերող հարցերի պատասխանները՝ առանց քաղաքական շահարկումների։
«Որդիների մասին պետք է խոսեն այն մարդիկ, ովքեր պետք է մտածեն՝ իրենց որդիները որտե՞ղ են եղել, ի՞նչ են արել»,- ասել է նա: