Միացյալ Նահանգներում կարծում են, որ ՆԱՏՕ-ի եվրոպացի դաշնակիցները վերածվել են ահաբեկչական կառույցների համար նպաստավոր ֆինանսական, լոգիստիկ եւ մարդկանց հավաքագրման հարթակների։ Այս մասին տեղեկանում ենք Սպիտակ տան գործող վարչակազմի «Ահաբեկչության դեմ պայքարի ռազմավարության» մասին հրապարակված զեկույցից։ Փաստաթղթում ասվում է, որ եվրոպական պետությունները շարունակում են մնալ Միացյալ Նահանգների համար կարեւոր ավանդական դաշնակիցներ ահաբեկչության դեմ պայքարի ոլորտում, սակայն նաեւ ֆիքսում են, որ աճել են այն սպառնալիքները, որոնք կապված են ահաբեկչական կառույցների կողմից Եվրոպայի տարածքի օգտագործման հետ կապված։ Դա, ընդ որում, կապված է եւ լոգիստիկայի, եւ ֆինանսական հարցերի եւ մարդկանց հավաքագրման հնարավորությունների հետ։

Հատուկ ուշադրություն է դարձվել Եվրոպայում, ըստ ամերիկյան կողմի գնահատման,՝ չվերահսկվող միգրացիային, որը ահաբեկիչների կողմից կարող է օգտագործվել եվրոպական երկրներ ներթափանցելու համար։ Վաշինգտոնը կոչ է արել եվրոպական երկրներին խստացնել իրենց միգրացիոն քաղաքականությունները։ ԱՄՆ-ում նաեւ հայտարարել են, որ Եվրոպան շարունակում է մնալ ահաբեկչական կառույցների համար հիմնական թիրախներից մեկը, եւ Եվրոպան այն տարածքներից է, որտեղ կարող են առաջանալ անվտանգային նոր սպառնալիքներ՝ ահաբեկչական խմբավորումների գործողությունների հետեւանքով։