ԱԱ-2026․ 11 մլն դոլար՝ եզրափակիչի եզակի տոմսի համար
Sun, 10 May 2026 20:00:57 +0400
ՖԻՖԱ-ի՝ 2026 թվականի Աշխարհի առաջնության տոմսերի վերավաճառքի պաշտոնական հարթակում 11,5 միլիոն դոլար արժողությամբ եզրափակիչ խաղի տոմս է ներկայացվել, հայտնում է Sky Sports-ը։
Նշվում է, որ սա երրորդ կատեգորիայի մեջ մտնող տոմս է, որը սովորաբար ավելի էժան է ու ավելի հասանելի հանդիսատեսի համար։ Նստատեղը, որը վաճառվում է 11,5 միլիոն դոլարով, գտնվում է մարզադաշտի անկյունում, տրիբունաների ամենավերևում և այնքան էլ լավ տեսարան չունի խաղի վրա։
Եզրափակիչ հանդիպումը կկայանա հուլիսի 19-ին ԱՄՆ-ի Նյու Ջերսի նահանգի Իսթ Ռադերֆորդ քաղաքի MetLife ստադիոնում։
Ապրիլի վերջին 2026 թվականի Աշխարհի գավաթի եզրափակիչ փուլի չորս նստատեղերը նշված էին վերավաճառքի հարթակում՝ յուրաքանչյուրը 2,3 միլիոն դոլարից մի փոքր պակաս արժեքով:
ՖԻՖԱ-ի նախագահ Ջանի Ինֆանտինոն կատակել է, որ ինքն անձամբ հոթ-դոգ ու մի շիշ Կոկա-Կոլա կբերի բոլորին, ովքեր նման տոմս կգնեն։ Նա 2026 թվականի աշխարհի առաջնության տոմսերի բարձր գները բացատրեց մեծ պահանջարկով և ԱՄՆ-ում դրանց վերավաճառքի թույլտվությամբ։
2026 թվականի աշխարհի առաջնությունն առաջին անգամ կանցկացվի 48 ազգային հավաքականների մասնակցությամբ և առաջինը կլինի միանգամից երեք երկրներում՝ ԱՄՆ-ում, Կանադայում և Մեքսիկայում։ Մրցաշարը կտեւի հունիսի 11-ից հուլիսի 19-ը։