Կիևում պատմական են համարում Զելենսկու և Կոբախիձեի երևանյան շփումը
Mon, 11 May 2026 15:00:53 +0400
Ուկրաինան հույս ունի վերագործարկել հարաբերությունները Վրաստանի հետ և պատրաստ է շարունակել կառուցողական երկխոսությունը։
Այս մասին հայտարարել է Ուկրաինայի արտաքին գործերի նախարար Անդրեյ Սիբիգան Բրյուսելում ԵՄ արտաքին գործերի խորհրդի նիստից առաջ։
«Մենք ցանկանում ենք նոր էջ բացել մեր վրացի գործընկերների հետ», – ասել է Սիբիգան։
Նրա խոսքով՝ երկու երկրների ղեկավարների միջև վերջերս Երևանում կայացած հանդիպումը պատմական էր և հնարավորություն տվեց «մտքերի լավ փոխանակման»։
«Մենք բաց ենք այս կառուցողական երկխոսությունը շարունակելու համար։ Ես շուտով կհանդիպեմ իմ վրացի գործընկերոջ հետ Մոլդովայում», – նշել է Ուկրաինայի արտաքին գործերի նախարարը։
Սիբիգան հավելել է, որ Կիևը մտադիր է «համապատասխան կերպով կառուցել երկկողմ հարաբերությունների դիվանագիտական ուղին»։
«Մեր ժողովուրդները, մեր հասարակությունները արժանի են դրան։ Այո, մենք երկկողմ օրակարգում ունենք որոշ զգայուն հարցեր, բայց մենք պատրաստ ենք առաջ շարժվել», – ընդգծել է նա։