«Հրապարակ»․ Ինչ կտա Թուրքիայի որոշումը
Thu, 14 May 2026 08:00:54 +0400
2022 թվականից շարունակվող հարաբերությունների կարգավորման գործընթացի շրջանակներում Թուրքիայի եւ Հայաստանի միջեւ ուղիղ առեւտրի մեկնարկի բյուրոկրատական նախապատրաստական աշխատանքներն ավարտվել են՝ երեկ հայտարարեց Թուրքիայի արտաքին գործերի նախարարությունը։
Ըստ այդմ՝ Թուրքիայից երրորդ երկրների միջոցով Հայաստան մեկնող կամ նույն երթուղով ժամանող ապրանքների վրա այժմ, որպես վերջնական նշանակման կետ կամ ծագման երկիր, կարող է նշվել՝ «Հայաստան/Թուրքիա»։
Հիշեցնենք․ նախօրեին Երեւանի Շենգավիթ շրջանում քարոզարշավի ժամանակ ԱԳ նախարար Արարատ Միրզոյանը Նիկոլ Փաշինյանի ականջին շշնջում էր, թե` «վելքոմ» ասենք. «Թուրքերն այսօր բացում են, ողջունող տեքստ պատրաստենք»։ Եվ երեկ ՀՀ ԱԳՆ-ն տարածեց ողջույնի տեքստը՝ նշելով, թե այս որոշումը Հայաստանի եւ Թուրքիայի հարաբերությունների կարգավորման գործընթացի հերթական արդյունքն է։ Իսկ ի՞նչ կտա այդ որոշումը Հայաստանին։
Նախկինում Հայաստանը Թուրքիայի` ապրանքներ արտահանող կամ ներկրող երկրների ցանկում ներառված չի եղել, ուստի ապրանքները վերաարտահանել են Հայաստան, իսկ հիմա փոխվում է այդ հանգամանքը, եւ, ըստ մեր զրուցակից տնտեսվարողի, Թուրքիայից Հայաստան ապրանքների ներկրումը փոքր-ինչ կէժանանա, կշահեն ներկրողները: Փոխարենը կտուժի տեղական արտադրողը։ Բայց այս չնչին հանգամանքը գործող իշխանությունները որպես աննախադեպ ձեռքբերում են ներկայացնում։