Քննչական կոմիտեի Երևան քաղաքի քննչական վարչությունը վարույթ է սկսել բլոգեր Արտակ Ավետիսյանի նկատմամբ եւ այսօր հաղորդագրություն է տարածել, թե «նախաքննության ընթացքում առերևույթ փաստական տվյալներ են ձեռք բերվել այն մասին, որ 2026 թվականի մայիսի 12-ին Ա.Ա.-ն օգտագործելով տեղեկատվական և հաղորդակցական տեխնոլոգիաները՝ ֆեյսբուքյան իր էջում հրապարակված տեսանյութի ընթացքում կատարել է ատելություն, խտրականություն, անհանդուրժողականություն, թշնամանք հրահրելու և քարոզելու վերաբերյալ հայտարարություններ»: Հիշեցնենք, որ Ավետիսյանն ընդամենը լայվով Նիկոլ Փաշինյանին հրավիրել էր Շենգավիթ եւ խոստացել էր «լավ ընդունելություն» ցույց տալ ու «ս…իր» անել իրենց թաղի: Թե այդ խոսքի որ հատվածն է Քննչական դիտել որպես «Ֆեյսբուքում ատելություն, անհանդուրժողականություն, թշնամանք հրահրելու և քարոզելու հայտարարություններ», պարզ չէ: Ավետիսյանի նկատմամբ հարուցվել է հանրային քրեական հետապնդում՝ Քրեական օրենսգրքի 329-րդ հոդվածի 2-րդ մասի 3-րդ կետով , նա ձերբակալվել է և Քննչականը նրա նկատմամբ կալանք կիրառելու միջնորդություն է տարել դատարան:

Մենք առաջարկում ենք Քննչական կոմիտեին նույն բծախնդրությամբ լսել ՔՊ-ականների լայվերը` Նիկոլ Փաշինյանի, Ռուբեն Ռուբինյանի, Վահագն Ալեքսանյանի եւ մյուսների, կարդալ նրանց եւ այլ ՔՊ-ականների գրառումներ: Կհամոզվեն, որ շատ ավելի առիթներ կան քրեական վարույթներ հարուցելու հենց նույն հոդվածով եւ ավելի հիմնավորված կլինեն այդ վարույթները ու կարիք չի լինի ճնշում գործադրել դատավորների վրա, որ կալանքի սանկցիա տան:

Հիշեցնենք, որ մենք գրել էինք, որ Արտակ Ավետիսյանին կալանքի են տանելու։