Ընդդիմադիր հայացքներ ունեցողների մոտ 45%-ը մեղադրյալի կարգավիճակ է ունեցել
Fri, 15 May 2026 12:55:52 +0400
AntiCor հակակոռուպցիոն հարթակի կողմից իրականացված մեկամսյա ուսումնասիրությունների արդյունքում, ըստ փաստաբան Արսեն Բաբայանի, հայտնաբերվել են համակարգային կոռուպցիայի մի շարք լուրջ խնդիրներ։ Այս մասին նա հայտարարել է «Կոռուպցիան նախընտրական փուլում» աշխատաժողովի ընթացքում։
Բաբայանի խոսքով՝ թեև պաշտոնական նախընտրական քարոզարշավը նոր է մեկնարկել, իրականում քաղաքական ակտիվ գործընթացները շարունակվել են նաև դրանից առաջ։
Նա նշել է, որ կոռուպցիոն ռիսկերից մեկը շարունակում են մնալ քրեական վարույթները, որոնք, իր գնահատմամբ, հաճախ օգտագործվում են որպես քաղաքական ազդեցության գործիք։ Բաբայանը պնդել է, որ քրեական օրենսգիրքը որոշ դեպքերում կիրառվում է որպես ճնշման միջոց ընդդիմադիր դիրքորոշում ունեցող անձանց նկատմամբ։
Նրա խոսքով՝ ընդդիմադիր հայացքներ ունեցող անձանց զգալի մասը՝ մոտ 45 տոկոսը, տարբեր ժամանակներում ունեցել է մեղադրյալի կարգավիճակ, ինչը, ըստ նրա, մտահոգիչ ցուցանիշ է քաղաքական գործընթացների համատեքստում։
«Ընդդիմադիր հայացքներ ունեցող անձանց մոտ 45 տոկոսն արդեն գոնե մեղադրյալի կարգավիճակ ունեցել է ամենատարբեր առիթներով»,- ասել է նա: